पछिल्लो केही समययता बलिवुडका सबैजसो फिल्महरूले विवादको सामना गरिरहेका छन् । विशेष गरेर प्रदर्शन उन्मुख फिल्महरू विवादमा फसिरहेका छन् । धेरै फिल्म तथा वेब सिरिजले धार्मिक भावनामा चोट पुर्‍याएको आरोप खेपिसकेका छन् । 

पछिल्लोसमय शुक्रवारदेखि प्रदर्शनमा आउन लागेको फिल्म ‘मासुम सवाल’ को पोस्टर विवादमा परेको छ । पोस्टरमा स्यानिटरी प्याडमा फिल्मका कलाकारहरूसँगै भगवान् श्रीकृष्णको तस्वीर राखिएको छ । श्रीकृष्णको तस्वीर प्याडमा राखिएको भन्दै आपत्ति जनाइएपछि पोस्टर विवादमा फसेको हो । 

फिल्मको पोस्टर विवादमा आएपछि निर्देशक र कलाकारहरूले समेत यसबारेमा सफाइ दिएका छन् । उनीहरूले कसैको धार्मिक आस्थामाथि चोट पु¥याउने आफूहरूको चाहना नभएको प्रष्ट पारेका छन् । 

नायिका एकावली खन्नाको उक्त फिल्म ५ अगस्ट अर्थात् भोलि शुक्रवारदेखि प्रदर्शनमा आउँदैछ । फिल्म रजस्वालाको बेला गरिने भगवानको पूजासम्बन्धी कथामा आधारित छ । त्यही भएकाले निर्माण टिमले सार्वजनिक गरेको पोस्टरमा स्यानिटरी र न्यापकिन प्याडमा भगवान श्रीकृष्णको तस्वीर प्रयोग गरिएको हो । स्यानिटरी प्याडमा भगवानको आकृतिको वाटरमार्क पनि प्रयोग गरिएको छ । 

यस विवादका सम्बन्धमा फिल्ममा वकिलको भूमिका निर्वाह गरेकी नायिका एकावलीले निर्माण टिमको उद्धेश्य कसैको भावनामा चोट पुर्‍याउनु नरहेको प्रष्ट पारेकी छन् । उनले फिल्मको उद्धेश्य रजस्वालाको सम्बन्धमा रहेको पुरानो मान्यतामा परिवर्तन ल्याउनु रहेको बताएकी छन् । उनले यससम्बन्धमा रहेको कूरिति र अन्धविश्वासलाई परिवर्तन गर्नु फिल्मको उद्धेश्य रहेको प्रष्ट पारेकी छन् । 

फिल्मका निर्देशक सन्तोष उपाध्यायले फिल्म महिलाहरूमा हुने महिनावारीमा आधारित रहेको जानकारी दिँदै पोस्टरमा स्यानिटरी प्याड राख्नु जरुरी भएको बताएका छन् । उनले भने प्याडमा कृष्ण नभएको दाबी गरेका छन् ।