०३ असार २०८३, बुधबार
नागरिकतामा अपमानित नाम कुकुर्नी कमिनी लेखिएका कारण समाजमा सास्ती झेलिरहेकी ताराखोला गाउँपालिका–४ की सावित्रा कामीले ३५ वर्षपछि आफ्नै नामको नागरिकता पाएकी छन् ।
अपमानित नामका विषयमा समाचार प्रकाशित भएपछि गृह मन्त्रालयले नाम संशोधन गर्न निर्देशनसहित सबै जिल्ला प्रशासनलाई परिपत्र गरेपछि उनले जिल्ला प्रशासन कार्यालय बागलुङमा नागरिकता सच्याउनका लागि निवेदन दिएकी थिइन् ।
नयाँ नामको नागरिकता पाएपछि फुरुङ्ग हुँदै ५६ वर्षीया सावित्रले आफ्नो जीवनको ठूलो सपना पूरा भएको बताइन् । ‘नागरिता देखाउन पनि शरम भएको थियो, अब त केही चिन्ता छैन, ढुक्कले नागरिकता बोक्न सक्छु,’ सावित्राले हाँस्दै भनिन् ।
नागरिकताको नाम सच्याउन सकिने हल्ला सुनेलगत्तै उनी पतिसँगै वडा कार्यालय पुगेकी थिइन् । ४ नम्बर वडाका अध्यक्ष जीतबहादुर खत्रीले उनलाई परामर्श तथा कानूनी र सहयोग सिफारिस गरेका थिए । लगत्तै नाम संशोधनका लागिी आवश्यक कागजपत्र बोकेर बिसौना गाउँबाट उनीहरू ७० किलोमिटर टाढा जिल्ला प्रशासन कार्यालय बागलुङ पुगेका थिए ।
बागलुङका सहायक प्रमुख जिल्ला अधिकारी गणेशप्रसाद पौडेलले सावित्रालाई सोमवार नागरिकताको प्रतिलिपि प्रमाणपत्र दिएका छन् । नाम सच्चिएको नागरिकता पाएपछि सावित्रासँगै रहेका उनका पति हस्तराम, छोरा भविलाल र छोरी खुशी भएका छन् ।
सबैले कुकुर्नीको छोरो भनेर जिस्क्याउँदा छोरा भविलालले ५ कक्षा पढ्दापढ्दै विद्यालय छाडेका थिए । अहिले उनी ३० वर्षका भइसकेका छन् । ‘सायद पहिल्यै सच्चिएको भए मैले पढाइ छाड्नुपर्ने थिएन होला तर जे भए पनि अब ढियो भयो राम्रो भयो,’ उनले भने ।
म्याग्दीको मालिका गाउँपालिका–५ अर्मनमा २०२३ सालमा जन्मेकी सावित्रीको बोली त्यति प्रस्ट छैन । अपाङ्गताका कारण सावित्राले आफ्नो नामबारे बताउन नसक्दा घुम्ती टोलीका सदस्यले ‘कुकुर्नी कमिनी’ राखिदिएको हुनसक्ने अड्कल गरिएको छ । नागरिकता संशोधन भएकाले अब सावित्राको मतदाता परिचयपत्र पनि संशोधन हुने जिल्ला निर्वाचन कार्यालयका सूचना अधिकारी गोकुल शर्माले बताएका छन् ।
उनको नामको समस्याका विषयमा लोकान्तरमा दिलनिशानी मगरले स्तम्भ समेत लेखेका थिए ।
