०६ साउन २०८३, बुधबार
प्रधानमन्त्री निवास बालुवाटारमा बसेको सत्तारूढ गठबन्धनको बैठकमा सिट बाँडफाँटको कुरा नमिलेपछि बिना निश्कर्ष बैठक सकिएको छ । शीर्ष नेताहरू सम्मिलित बैठकले सिट बाँडफाँटबारे ठोस धारणा बनाउन नसकेको बैठकमा सहभागी एक नेताले जानकारी दिए ।
कुन दलले कति सिट पाउने भन्ने नै टुंगो लाग्न नसकेपछि कार्यदलले तयारी गर्ने सहमति बनेको बैठकमा सहभागी ती नेताले बताए । कार्यदलको बैठक भदौ २० मा बस्ने र तयारी गरेर शीर्ष नेतालाई जानकारी गराउने सहमतिसहित आइतवारो बैठक सकिएको ती नेताले बताए ।
बैठकबाट बाहिरिएपछि सञ्चारमन्त्री ज्ञानेन्द्र कार्कीले बैठक निश्कर्षमा पुग्न नसकेको बताए । सोमवार र मंगलवार कार्यदलले तयारी गरेर शीर्ष नेतालाई जानकारी गराउने उनले बताए ।
कार्यदलले दुई दिनमा गर्ने तयारीले सिट बाँडफाँटको विषयलाई टुंगोमा पु¥याउने मन्त्री कार्कीको दाबी छ ।
गठबन्धनमा रहेका नेताहरूले धेरै संख्यामा सिट दाबी गरेको कारण बैठक निश्कर्षमा पुग्न नसकेको उनले बताए । ‘बैठक जारी छ । भोलि १ बजे फेरि हाम्रो कार्यदलको बैठक छ । कार्यदलले लगातार बैठक बसेर सहमतिपूर्ण निर्णयमा पुग्छ र त्यो निर्णय शीर्ष नेतालाई पेश गर्छौं’, बैठकबाट बाहिरिएपछि कार्कीले भने ।
‘हिजो अस्तिको अवस्थाभन्दा खासै प्रगति भएको छैन । कुन दलले कति सिट पाउने भन्ने नै यकिन भएको छैन’, बैठकमा सहभागी अर्का एक नेताले भने ।
गठबन्धनको बैठक बस्नुअघि प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डले छुट्टै छलफल गरेका थिए ।
उक्त छलफलमा जित हारको सुक्ष्म अध्ययन गरेर मात्रै सिट र निर्वाचन क्षेत्र बाँडफाँट गर्नुपर्नेमा दुई नेता सहमत भएको बताइएको छ ।
