अर्थविद् डा.स्वर्णिम वाग्लेले अमेरिकी सहयोग परियोजना (एमसीसी) चीनको प्रतिवाद गर्नको लागि नआएको दाबी गरेका छन् । शुक्रवार काठमाडौंमा आयोजित एक अन्तरक्रिया कार्यक्रममा बोल्दै उनले लामो समयको प्रक्रियाबाट नेपालको चाहनामा एमसीसी आएको बताए । 

उनले नेपालले २०११ देखि एमसीसी सहयोग ल्याउने प्रयास गरे पनि २०१७ देखि विवादमा आएको बताए । डा. वाग्लेले नेपालमा ठूला पूर्वाधार विकास निर्माणमा आउने वैदेशिक लगानीको विषयमा वास्तविकता जानकारी नभएर हाउगुजी हुन थालेको बताए । 

नेपालमा अझै पनि ठूला वैदेशिक दातृ निकाय भनेको एशियाली विकास बैंक, विश्व बैंक हो भन्ने मानसिकता रहेको उल्लेख गर्दै उनले नेपालले ४० वर्षको लागि १ प्रतिशत ब्याजमा ऋण पाउँदा समेत खर्च गर्न नसकेको बताए । उनले आफू सत्तामा भएको भए कति वैदेशिक ऋण लिएर धेरै भौतिक पूर्वाधार बनाउने थिए? जस्तो लाग्ने गरेको बताए । उनले अब वैदेशीक दातृ निकायहरुले विगतको जस्तो नेपाललाई सस्तो ब्याजमा ठूलो ऋण दिने झ्याल बन्द हुने अवस्थामा पुगेको दाबी गरे । 

‘नेपाल विकासोन्मुख देश हुँदैमा वैदेशिक सहयोगमा असर गर्दैन । नेपालले ४० वर्षको लोन १ प्रतिशत ब्याजमा पाउँदासमेत खर्च गर्न नसक्ने अवस्थामा छौँ । हामी सत्तामा भएको भए कति वैदेशिक ऋण लिएर कति धेरै भौतिक पूर्वाधार बनाइन्थ्यो जस्तो लाग्छ । अब त्यो झ्याल बन्द हुनेवाला छ’, उनले भने, ‘अब धेरै ठूलो रकममा लोन पाउनेवाला छैनौं । विस्तारै नेपाल पनि माइक्रो अर्थतन्त्र राखेर निजी क्षेत्रको लगानी गर्ने चरणमा हामी पुग्दैछौँ । वैदेशिक ऋण कम हुँदै गएपछि बाहिर स्रोत खोज्नुपर्छ । त्यसपछि अहिलेको जस्तो छाडा र गैरजिम्मेवार अर्थनीति बनाउने कार्य बन्द हुन्छ ।’ 

उनले अब वैदेशिक ऋण नपाएर आन्तरिक स्रोतबाट लगानी खोज्नुपर्ने अवस्था आउनसक्ने बताए । डा. वाग्लेले त्यस्तो अवस्था भए अहिलेको जस्तो छाडा र गैरजिम्मेवार अर्थनीति बनाउने कार्य बन्द हुने बताए । उनले युवा पुस्तामा ३० वर्षमा मुलुकको प्रतिव्यक्ति आय ४ हजार डलर पु¥याउने गरी पाँच, ७ वर्षमा त्यो डिल गर्नसक्ने नेतृत्व आवश्यक रहेको बताए ।