भरतपुर, २० साउन— भरतपुर महानगरपालिका बडा नम्बर १९ को शुक्रबार पुनःमतदान सम्पन्न भएसँगै रातीदेखि नै मतगणना सुरु गरिएको छ ।
मुख्य निर्वाचन अधिकृतको कार्यालयका अनुसार राजनीतिक दलसँगको सहमतिपश्चात् राती साढे ११ बजेदेखि भरतपुरस्थित जिल्ला समन्वय समिति नजिक रहेको जिल्ला कराँते कवर्डहलमा मतगणना सुरु गरिएको हो । ४ ओटा समूह बनाएर मतगणना गर्न सुरु गरिएको हो भने गणना रातभर जारी रहनेछ ।
मतगणनाका क्रममा कुनै समस्या नआओस् भनेर मतगणनास्थललाई सुरक्षित र व्यवस्थित बनाइएको छ । मुख्य निर्वाचन अधिकृत कविप्रसाद न्यौपानेका अनुसार कुनै किसिमको समस्या आउन नदिनका लागि मतगणनास्थलमा तीन वटा र बाहिर दुई वटा सिसी क्यामेरा जडान गरिएको छ ।
मतगणनास्थलमा दलका प्रतिनिधि बस्ने स्थानमा तारजाली लगाइएको छ ।
मध्यरातमै च्यातिएको थियो मतपत्र आज मध्यरातदेखि मतगणना सुरु हुँदै गर्दा एउटा संयोग परेको छ । भरतपुर १९ को मतगणना चल्दै गर्दा गत जेठ १४ गते मध्यरातमै मतपत्र च्यातिएको थियो ।
मतपत्र च्यातिनुअघि सार्वजनिक गरिएको मतपरिणामअनुसार एमालेका मेयर उम्मेदवार देबी ज्ञवालीले ४० हजार ९ सय ८० मत ल्याउँदा माओवादी केन्द्रकी मेयर उम्मेदवार रेणु दाहालले ४० हजार १ सय ९६ मत ल्याएकी थिइन् ।
७३३ मतले ज्ञवाली अघि रहेको अवस्थामा मतपत्र च्यातिएको हो । रेणु दाहाललाई मेयरमा कांग्रेसको समर्थन रहेको छ ।
बैशाख ३१ को निर्वाचनमा १९ वडामा दुई हजार ८ सय ९७ मत खसेकामा जेठ १४ गते रातीसम्म एक हजार ८ सय ९ मत गणना भइसकेको थियो । हजार ८ सय ९ मत गणना गर्दा दाहालको ५१ मत बढी थियो ।
त्यसबेला वडा नम्वर १९ मा १ हजार ८८ मत गन्न बाँकी थियो भने भरतपुर २० को ३ हजार ३ सय २ मत गणना गर्न बाँकी नै थियो ।
रातभर गनेर भोलिपल्ट बिहान गणतन्त्र दिवसमा परिणाम घोषणा गर्ने तयारी रहेको भरतपुरको मतगणना एकाएक मतपत्र च्यातिएपछि रोकिन पुगेको थियो ।
यसरी भयो पुनः मतदानलामो विवाद र अन्योलपछि शुक्रबार भरतपुर महानगरपालिकाका १९ नम्बर बडाको निर्वाचन भएको हो । दलीय विवादले गत जेठ १४ गते मध्यराती ९० मतपत्र च्यातिएपछि रोकिएको भरतपुर १९ को मतदान सर्वोच्चको आइतबारको फैसलासँगै बुधबार भएको हो ।
सर्वोच्चले भरतपुर १९ को विवादबारे निर्वाचन आयोगको निर्णयलाई सदर गर्दै पुनः मतदान गर्ने फैसला गरेको थियो । सोसँगै आयोगको निर्देशनबमोजिम निर्वाचन अधिकृतको कार्यालयले दलीय परामर्शको आधारमा आजको लागि मतदानको मिति तय गरेको थियो ।
भरतपुर महानगरको मेयरमा एमालेका देबी ज्ञवाली र माओवादी केन्द्रकी रेणु दाहाल चुनावी मैदानमा छन् । आजको मतदानमा बैशाख ३१ को भन्दा २७ मत कम खसेको थियो । भोलिसम्ममा मतगणनाको अन्तिम नतिजा आइसक्ने अपेक्षा गरिएको छ ।
