आरुघाट पुगेर प्रचण्डले सम्झिए अध्यापन गरेको क्षण

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले गोरखाको आरुघाटमा आफूले अध्यापन गरेको क्षण सम्झिएका छन् । शुक्रवार साँझ आरुघाट पुगेका प्रचण्डले आफूले ४६ वर्ष पहिले आरुघाटमा शिक्षक भई अध्यापन गराउँदाको क्षण सम्झिएका हुन् । 

आफूले ४६ वर्षपहिले आरुघाटमा व्यवसायिक शिक्षक भई काम गरे पनि आज पनि सम्झना उस्तै ताजा रहेको बताए । उनले शिक्षकका रुपमा काम गरिरहँदा आरुघाटका बासिन्दाले अपार माया र सद्भाव दिएको भन्दै धन्यवाद ज्ञापन गरेका छन् । उनले, आरुघाटबाटै राजनीतिक आन्दोलनको नेतृत्व गर्ने प्रेरणा प्राप्त गरेको पनि बताएका छन् । 

‘आरुघाटका बासिन्दा तपाईंहरूले जस्तो माया, प्रेम र विश्वास दिनुभयो, मैले आरुघाट सम्झिरहने कारण त्यो पनि हो । मैले जीवनको फक्रदो समय आरुघाटमा तपाईंहरूको बीचमा बिताएको हुँ । मैले राजनीतिमा जे गरे, तपाईंहरूकै व्यवहारबाट प्रेरणा लिएको हुँ । मैले व्यवसायिक शिक्षकको हिसाबले किसानहरूको हितमा जे गरे, त्यसबाट पनि मैले प्रेरणा लिएको हुँ’, प्रचण्डले भने, ‘यहाँका सबैले मलाई आत्मिय प्रेम दिनु भएको थियो । त्यो मैले बिर्सन सकेको छैन । हुन त ४६ वर्ष बितिसकेको छ । तर, अहिले पनि सम्झना उस्तै ताजा छ ।’

उनले आज पनि देशभरिका जनताले आफूलाई हेर्न चाहेको जस्तो भान भइरहेको बताए । 

‘यहाँबाट गएपछि म पार्टीमा पूर्णकालीन कार्यकर्ता बने, त्यसपछि पञ्चायतविरुद्ध आन्दोलन भयो । हामी संसद्मा गयौँ । त्यसपछि ठूलो युद्ध भयो, त्यसको नेतृत्व गर्ने दायित्व मैले प्राप्त गरे । त्यसपछि शान्तिप्रक्रिया भयो । संविधानसभाबाट संविधान प्राप्त भयो, गणतन्त्र, संघीयता, समावेशी प्राप्त भयो’, प्रचण्डले भने, ‘हुन त मलाई दुई पटक देशको प्रधानमन्त्री बन्ने सौभाग्य पनि प्राप्त भयो । अहिले फेरि तपाईंहरूको बीचमा आएको छ । अहिले देशभरि घुम्दा मलाई सुन्न खोजेजस्तो, छुन खोजेजस्तो, हेर्न खोजेजस्तो अनुभूति हुन्छ । मलाई गोरखा १ बाटै नाम सिफारिस गरेर उम्मेदवार बन्न आग्रह गर्नु भएको हो, तर पार्टीभित्र सल्लाह गरेर म गोरखा २ बाट उम्मेदवार बनेको छु ।’