जग्गाको किर्ते कागजात बनाई ठगी गरेको आरोपमा प्रहरीले एक व्यक्तिलाई पक्राउ गरेको छ । पक्राउ पर्नेमा पर्सा, वीरगन्ज १७ घर भई हाल वीरगन्ज–१४ पिपरा बहुअरी बस्ने ३६ वर्षीय नौसद अन्सारी रहेका छन् । 

अन्सारीसमेतले काठमाडौं–१३ सोल्टीमोडमा रहेको जाकिर हुसेन अन्सारी र नौसद हुसेन अन्सारीको नाममा रहेको जग्गा किर्ते हस्ताक्षर गरी नक्कली करारनामा बनाई ठगी गरेको प्रहरीको दाबी छ । उनीहरूले घरेलु तथा साना उद्योग कार्यालय काठमाडौं र कम्पनी रजिष्ट्रारको कार्यालय काठमाडौंमा उक्त नक्कली करारनामा पेश गरी हिमालयन होटेल प्रा. लि. नामक कम्पनी दर्ता गराई ४ करोड ५० लाख रकम लिई ठगी गरेको थिए । 

ठगी मुद्दामा फरार रहेका उनी बुधवार पक्राउ परेका हुन् ।