२२ असार २०८३, सोमबार
चुनावी सरगर्मी बढ्दै गर्दा उम्मेदवार, नेता र कार्यकर्तालाई भ्याइँनभ्याइँ छ । मंसिर ४ गते तोकिएको प्रदेशसभा र प्रतिनिधिसभा निर्वाचनको मिति नजिकिँदै जाँदा धेरैलाई चुनावले तानेको छ ।
किसानलाई चुनावी सरगर्मीभन्दा खेतीपातीको चटारो छ । बरु उनीहरू पानीले पाकेको धान थन्क्याउन नदिएला कि भनेर पिरोलिएका छन् । पाकेको धान भकारीमा थन्क्याउने चटारोमा छन् ।
जिल्लाका अधिकांश किसान यतिबेला धान थन्क्याउने चटारोमा छन् । उनीहरूलाई निर्वाचनमा कसले जित्ला र सरकार बनाउँला भन्ने भन्दा पनि यस पटक कति धान भित्र्याइएला भन्ने चिन्ता बढी छ । इलामको सूर्योदयका जगन्नाथ सापकोटा भन्छन्, ‘वर्षभरको कमाइ यहीँ धान हो भकारीमा थन्क्याउन मौसमले नदेला कि भन्ने मात्र पीर छ ।’
पोहोर साल बिटा लगाउन ठिक्क पारेको धान झरी परेर बर्बाद पारिदिएको सम्झिदै उनले भने, ‘यो साल त बेलैमा धान भित्र्याउन पाए हुन्थ्यो ।’
सापकोटालाई निर्वाचन नेताको लागी मात्र हो जस्तै लाग्छ । ‘चुनाव त नेताका लागी त रहेछ एकदिन भोट हाल्न जाउँला, जसले जितून्, काम कसैले गर्ने होइन क्यारे ।’ उनले विक्रम संवत् २०४८ सालबाट निरन्तर मतदान गर्दै आएका छन् । उनले भने, ‘म जस्ता हजारौं किसानको दुःख जस्ताको त्यस्तै छ । उनीहरू भोट जितेर जान्छन् हाम्रो दुःख हामीसँगै ।’
माईजोगमाईका रोशन दियालीको खेतमा समयमा नै मल नपाएर धान सधैं जस्तो फलेको छैन । बेलामा मल लगाउन नपाएपछि धानको बाला कम लागेको गुनासो गर्दै दियाली भन्छन्, ‘उ त्याँ हेर्नुन्, धानको गुबो नै आउन सकेन । कमसेकम किसानलाई मल बीउविजन मात्रै बेलैमा पाए काम गरेर खान त सकिन्छ ।’
