नेपाल पत्रकार महासंघ झापा शाखाले पत्रकार महिलालाई सुत्केरी हुँदा २५ हजार रुपैयाँ शल्यक्रिया खर्च उपलब्ध गराउने भएको छ ।

महासंघको हालै सम्पन्न साधारण सभाले सुत्केरी, बिरामी र मृत्यु संस्कारमा सहयोग दिने निर्णय गरेको शाखाका अध्यक्ष एकराज गिरीले बताए । उनका अनुसार महिला पत्रकार सुत्केरी हुँदा शल्यक्रिया गर्नुपरेमा २५ हजार रुपैयाँ दिने निर्णय गरेको छ भने महासंघका सदस्य बिरामी तथा घाइते हुँदा ३० हजार रुपैयाँ उपचार सहयोग दिइने भएको छ ।

पत्रकारको मृत्यु हुँदा आश्रित परिवारलाई ५० हजार रुपैयाँ उपलब्ध गराइने समेत उनले जानकारी दिए । नेपाल पत्रकार महासंघ झापाले पत्रकारको सामाजिक सुरक्षाका लागि १ करोड रुपैयाँको पत्रकार उपचार कोष स्थापना गरेको छ । कोषमा दाताबाट सहयोग उठाएर हाल ६४ लाख रुपैयाँ जम्मा भइसकेको छ ।

कोषको व्याजबाट पत्रकार बिरामी तथा घाइते भएको अवस्थामा उपचार खर्च यसअघिदेखि नै उपलब्ध गराउन थालिएको छ ।