मानव बेचबिखन मुद्दाका फरार प्रतिवादी कञ्चन गाउँपालिका–५ बस्ने आरने माइला भन्ने मीनबहादुर विक कामीलाई सोमवार प्रहरीले पक्राउ गरेको छ । 

जिल्ला अदालत कपिलवस्तुको २०७४ असार १९ गतेको फैसलाले मानव बेचबिखन मुद्दामा ३० वर्ष कैद, २ लाख ५० हजार रुपैयाँ जरिबाना तथा १ लाख २५ हजार रुपैयाँ पीडित महिलाहरुलाई क्षतिपूर्ति दिलाउने फैसला भई फरार रहेका उनलाई इलाका प्रहरी कार्यालय सालझन्डीबाट खटिएको प्रहरीले सैनामैना नगरपालिका–५ बुद्दनगरबाट पक्राउ गरेको हो । 

२०७० कात्तिकमा सालिकराम विकले २ जना महिलालाई प्रलोभनमा पारी दाङ लगेर मीनबहादुरको जिम्मा लगाएका थिए । मीनबहादुरले भारतको पञ्जाव लगेर बग्गी नाम गरेको मानिसलाई ति महिलाहरूजिम्मा लगाएको थिए । भारत पुगेपछि पीडित महिलाहरूले आफूहरू बेचिएको थाहा पाएपछि भागेर नेपाल फर्किएका थिए । उनीहरूले २०७० साल पुसमा इलाका प्रहरी कार्यालय कृष्णनगरमा उजुरी गरेपछि अनुसन्धानको क्रममा प्रतिवादी सालिकराम विक तत्काल पक्राउ परेका थिए भने फरार मुख्य कसूरदार मीनबहादुर विकलाई अदालतले उक्त कैद, जरिबाना र क्षतिपूर्ति भराउने फैसला गरेको थियो ।