युक्रेनका राष्ट्रपति भोलोदीमीर जेलेन्स्कीले रुसी आक्रमणको ३०० दिनपछि अमेरिकाको राजधानी वाशिङटनको भ्रमण गर्दा अपनाएको गोप्यता निकै रोमाञ्चक छ । 

मंगलवार अबेर राति उनी गोप्य रूपमा ट्रेन चढेर पोल्यान्डतर्फ लागेका थिए । 

त्यसको भोलिपल्ट बिहान उनी पोल्यान्डको दक्षिणमा रहेको शहर प्रजेमिसिल पुगे । त्यहाँ ट्रेन स्टेसनमा उनले युक्रेनका लागि अमेरिकी राजदूत ब्रिजेट ब्रिंकलाई भेटेको भिडियो फूटेज निजी टीभी च्यानल टीभीएनले प्रसारण गरेको थियो । 

जेलेन्स्कीको भ्रमणको योजना धेरै दिनअघि बनाइएको थियो । उनको सुरक्षाका विषयमा चिन्ताका कारण योजनालाई गोप्य राखिएको थियो । 

तर मंगलवार एक अमेरिकी न्युजलेटर पंचबाउल न्युजका पत्रकारले यस विषयमा ट्वीट गरेका थिए । 

पोल्यान्डमा जेलेन्स्की अमेरिकी सरकारको विमान चढेका थिए । उक्त विमान बुधवार मध्याह्न वाशिङटन नजिक मेरील्यान्डमा रहेको जोइन्ट बेस एन्ड्रुजमा ओर्लेको थियो । 

त्यसपछि उनी गाडी चढेर राष्ट्रपतीय गेस्ट हाउस ब्लेयर हाउस पुगेका थिए । त्यहाँ फ्रेश भएर उनी नजिकैको ह्वाइट हाउस पुगेका थिए । त्यहाँ उनलाई राष्ट्रपति जो बाइडन र उनकी पत्नी जिलले स्वागत गरेका थिए । 

सुट र टाईको साटो जेलेन्स्कीले हरियो स्वेटर र कार्गो प्यान्ट लगाएका थिए । आफू युद्धग्रस्त क्षेत्रबाट आएको सन्देश दिनका लागि उनले यो पहिरन छानेका थिए । 

जेलेन्स्कीले अमेरिकामा १२ घन्टाभन्दा कम समय बिताएका थिए । यस भ्रमणका विषयमा बाइडन र जेलेन्स्कीबीच डिसेम्बर ११ मा फोनवार्ता भएको थियो । त्यसको तीन दिनपछि ह्वाइट हाउसले उनलाई औपचारिक निम्तो दिएको थियो । 

जेलेन्स्कीले गत शुक्रवार यो निम्तो स्वीकारेका थिए र आइतवार भ्रमण पक्का गरिएको थियो । 

जेलेन्स्कीलाई सही दिन कुरेर अमेरिका भ्रमण गराउने कुनै गणितीय हिसाबकिताब नगरिएको बाइडन प्रशासनका एक अधिकारीले बताए । तर यस भ्रमणले जाडो याममा युक्रेनलाई अमेरिका तथा साझेदारहरूले गर्ने सहायतालाई थप गति दिएको उनको भनाइ छ ।