नवनिर्वाचित सांसदहरुले छाडा पशुचौपायाले स्थानीय कृषकलाई दुःख दिन थालेपछि व्यवस्थापनका लागि ऐन निर्माणको पहल थाल्ने प्रतिवद्धता जनाएका छन् । असहाय गाईबाछा संरक्षण अभियान संस्थाले आइतबार यहाँ आयोजना गरेको नवनिर्वाचित सांसदहरुको सम्मानमा आयोजित कार्यक्रममा उनीहरुले सो प्रतिवद्धता जनाएका हुन् ।

प्रतिनीधि सभाका चार जना सांसद र प्रदेश सभाका एक जना सांसदले सो प्रतिवद्धता जनाएका छन् । सो अवसरमा बझाङ्ग जिल्लाबाट निर्वाचित सांसद बद्री पाण्डे, काठमाडौंबाट निर्वाचित सन्तोष चालिसे, समानुपातिक सांसद शान्ति श्रेष्ठ र प्रतिमा गौतम तथा प्रदेश सभा सांसद बिमल ठकुरीले अबको संसद अधिबेशनमा सडकमा अलपत्र पारिएका गाईबाछाहरुको अधिकार र संरक्षणको पक्षमा कानून निर्माणार्थ सदनमा आवाज उठाउने प्रतिबद्धता ब्यक्त गरे ।

कार्यक्रममा आचार्य श्री महेन्द्रले नेपाली संस्कारमा गौरक्षाको महत्वका बारेमा प्रकाश पारेका थिए । कार्यक्रममा अभियानका संस्थापक उत्तम पुडासैनी, संस्थाका कोषाध्यक्ष भगवान पुडासैनीले अभियानका बारेमा जानकारी गराएका थिए ।   

असहाय गाईबाछा संरक्षण अभियानले सडकमा अलपत्र पारिएका गाईबाछाहरुको संरक्षण गर्दै खाना, छाना, उपचारको प्रबन्ध मिलाउँदै आएको छ । खुल्ला आकाशमुनि अलपत्र गाईबाछाले बस्न नपरोस् भन्ने उद्देश्यले सडकमा अलपत्र अवस्थामा रहेको गाईबाछाको उद्धार र उचित व्यवस्थापनका लागि सो संस्थाले पहले गर्दैआएको छ ।  आश्रयस्थलमा झण्डै २०० छाडा गाईबाछा रहेको सो संस्थाले जनाएको छ ।