२८ जेठ २०८३, बिहीबार
नेपाली कांग्रेसका प्रमुख सचेतक रमेश लेखकले राष्ट्रिय प्रजातन्त्र पार्टी (राप्रपा)लाई आफ्नो पार्टीले प्रधानमन्त्रीका लागि प्रस्ताव नगरेको बताएका छन् । शुक्रवार नयाँबानेश्वरस्थित संसद् भवन परिसरमा सञ्चारकर्मीहरूले राखेका जिज्ञासाको जवाफ दिने क्रममा प्रमुख सचेतक लेखकले प्रधानमन्त्रीमा राप्रपालाई आफ्नो पार्टीले प्रस्ताव नगरेको प्रष्ट पारेका हुन् ।
लेखकले आफ्नो पार्टी एमाले–माओवादी केन्द्रसहितको सत्ता समीकरणलाई भत्काएर नयाँ समीकरण बनाउने काममा नलागेको पनि बताए । उनले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिने बारेमा भने यही पुस २६ गते बिहान बस्ने पार्टी संसदीय दलको बैठकले निर्णय गर्ने जानकारी दिए ।
‘हामी यो समीकरण भत्काउने, नयाँ समीकरण बनाउने काममा लागेका छैनौँ । हाम्रो भोलि संसदीय दलको बैठक छ । त्यसपछि हामी २६ गते बिहान फेरि संसदीय दलको बैठक बस्छौँ । र, सरकारलाई विश्वासको मत दिने प्रस्तावमा हाम्रो दलको धारणा हामी २६ गतेको बिहान सार्वजनिक गर्छौैँ । अहिलेलाई यहाँले भन्नु भएको जस्तो गठबन्धन भत्काउने, नयाँ गठबन्धन बनाउने कुरा छैन । अहिले हामी हाम्रो आन्तरिक तयारीमा छौँ’, लेखकले भने, ‘हामी अब यो नयाँ प्रतिनिधिसभामा पार्टीलाई एकताबद्ध, सशक्त रूपले कसरी अगाडि लिएर जान्छौँ, हाम्रा भूमिकाहरू के हुन्छन् ? त्यसमा केन्द्रित भएर आन्तरिक तयारीमा जुटिसकेका छौँ । भोलिबाट हाम्रो पनि संसदीय दलको औपचारिक बैठकहरू शुरू हुन्छन् । अहिले पनि हामी आन्तरिक तयारी र गृहकार्य गरिरहेका छौँ । राप्रपाले के भनेछ, त्यो मलाई थाहा छैन । हामीले राप्रपालाई प्रधानमन्त्रीमा प्रस्ताव गरेका छैनौँ ।’
प्रधानमन्त्री प्रचण्डले यही पुस २६ गते बिहान ११ बजे बोलाइएको प्रतिनिधिसभा बैठकमा विश्वासको मत लिनेछन् ।
