२१ जेठ २०८३, बिहीबार
विश्वासको मत सहितका विषयमा छलफल गर्न प्रमुख प्रतिपक्षी दल नेपाली कांग्रेस संसदीय दलको बैठक बस्दैछ ।
सिंहदरबारस्थित संसदीय दलको कार्यालयमा कांग्रेसको बैठक बस्न लागेको हो ।
पुस २६ गते प्रधानमन्त्री पुष्पकमल दाहाल ‘प्रचण्ड’ले विश्वासको मत लिने भएपछि त्यसबारे निर्णय लिने सहितका विषयको छलफलका लागि कांग्रेस संसदीय दलको बैठक बस्न लागेको हो ।
कांग्रेसले सरकार गठनको तयारी गरिरहँदा पुरानो ५ दलीय गठबन्धन भत्केर नयाँ गठबन्धन बनेको थियो । सोही गठबन्धनबाट १६६ सांसदको समर्थनसहित पुस १० गते प्रचण्ड प्रधानमन्त्री नियुक्त भएका थिए ।
त्यसपछि मुखैमा आएको सत्ता कांग्रेसले गुमाउनुपरेको भन्दै सभापति शेरबहादुर देउवाको आलोचना भइरहेको छ । उनले राष्ट्रपति र प्रधानमन्त्री दुवै पद कांग्रेसले लिने हठ लिएका कारण प्रचण्डले एमालेसँग मिलेर सरकार गठन गरेको आरोप खेपिरहेका छन् ।
कांग्रेसले विश्वासको मत प्रचण्डलाई दिने सम्भावना कम रहेको बताइन्छ तर पनि आफूबाट बिच्किएर माओवादी एमालेसँग मिल्न पुगे पनि देउवाले प्रचण्डको आलोचना गरेका छैनन् । बरु सभामुख कांग्रेसले पाउने अवस्था आए प्रचण्डलाई विश्वासको मत दिने कि भन्नेबारे पनि देउवाले पार्टीमा छलफल गरेको एक नेताले दाबी गरेका छन् ।
भागबण्डामा माओवादीले प्रधानमन्त्री लिँदा राष्ट्रपति र सभामुख एमालेको भागमा परेको छ ।
