नेपाल मिटर ट्याक्सी व्यवसायी चालक समाजले मिटरजडित ट्याक्सीमा स्वचालित भाडा लागू गर्न माग गरेको छ । आफूहरुको व्यवसाय र लगानीको सूरक्षा नभएको भन्दै संघले आपत्ति जनाएको छ । शनिबार पत्रकार सम्मेलन गर्दै चालक समाजले राज्यले ट्याक्सी व्यवसायीलाई बन्धक बनाएको आरोप लगाएको हो ।

संघले १६ बुँदे मागहरु सार्वजनिक गर्दै  एकद््वार कर प्रणाली लागू गर्न पनि चालक समाजले सरकारसमक्ष आग्रह गरेको छ । महानगर वा सरकारले एप बनाएर ट्याक्सी सञ्चालन गर्ने व्यवस्था गर्नुपर्ने उनीहरुको माग छ । पेशा–व्यवसायका क्रममा विभिन्न मितिमा हत्या गरिएका र कुटपिट गरी घाइते बनाइएका ट्याक्सी व्यवसायीको न्यायका लागि सरकारको ध्यानाकर्षण गरेको छ ।

चालकले लगाउनु पर्ने पहेलो ज्याकेटलाई हटाउनु पर्ने, इम्बोस नम्बरमा नेपाली भाषाको प्रयोग गरिनुपर्ने लगायतका माग समाजलले राखेको छ । चालक समाजका संस्थापक अध्यक्ष सानु पूर्वछानेले अहिलेसम्म विभिन्न समयमा ४३ जना ट्याक्सी चालकको हत्या भएको बताए । उनीहरुको हत्यारा पहिचान गरी तत्काल कारबाही गर्न सरकारसमक्ष माग गरे । त्यसैगरी, इम्बोस्ड नम्बरमा राज्यले गरेको व्यवस्था आफूहरु मान्न तयार नरहेको उनको भनाइ छ । 

‘हामीलाई इम्बोस्ड नम्बर भनेर राज्यले कालो धब्बा लगाउन खोजेको छ । हामी पहेँलो प्लेटको नम्बर मान्दैनौं । नेपाल र नेपालको संवत् र देवनागरीमा जीपीएस फिट गरिएको नम्बर चाहिन्छ,’ उनले भने । माग पुरा नभए सम्पूर्ण सवारी साधन टुँडिखेलमा लगेर थुपारिदिने  उनले चेतावनी दिए । 

अर्का वक्ता तारा बरालले यातायात व्यवसायीलाई बीमा कम्पनीले उचित क्षतिपूर्ति नदिएको आरोप लगाइन् । प्राइभेट अस्पतालले सेटिङमा एम्बुलेन्स चालकसँग विरामी किनबेच गर्ने गरेको र सेटिङको आधारमा एम्बुलेन्स चालक र ट्राफिकले दुर्घटनामा घाइते भएकालाई प्राइभेट अस्पतालमा लग्नेगरेको उनको आरोप छ । 

साझा नेपाल केन्द्रीय महासंघका अध्यक्ष किरण नेपालले वार्ता, संवादको आधारमा समस्याको समाधान चाहेको बताए । सरकारले यातायात व्यवसायीको मागहरु नसुनेमा सडक आन्दोलनका लागि आफूहरु तयार रहेको बताए ।

चालक समाजका केन्द्रीय अध्यक्ष राजकुमार श्रेष्ठले यातायातको क्षेत्रमा विकृति बढेको र आफूहरुले यातायात व्यवसायलाई मर्यादित बनाउन चाहे पनि सरकारको निरिहताले सम्भव नभएको बताए । 

राज्यले कसैलाई असमान व्यवहार गर्न नहुने उनको माग छ । सरकार अभिभावक भएकाले नागरिक र व्यवसायीप्रति उत्तिकै उत्तरदायी हुनुपर्ने उनको सुझाव छ ।