युक्रेनका राष्ट्रपति  भोलोदीमीर जेलेन्स्कीले रुसका राष्ट्रपति भ्लादिमिर पुटिनसँग कुनै हालतमा शान्तिवार्ता नगर्ने बिहीवार बताएका छन् । 

स्काई न्युजसँग कुरा गर्दै जेलेन्स्कीले भने, ‘उनीहरू कुनै वार्ता चाहँदैनन् र आक्रमणअघि पनि त्यही सत्य थियो । पुटिनलाई शान्ति चाहिएकै छैन त्यसैले उनी सम्झौताको पक्षमा छैनन् ।’

‘युक्रेन उनका लागि पहिलो कदम मात्र हो । उनी ठूलो युद्ध गरिरहेका छन् भन्नेमा म विश्वस्त छु । हामी एक्यबद्ध नभएमा युक्रेनपछि अर्को कदम पनि चालिनेछ । हामीले सहयोग पाइरहेका छौं र जित्नेछौं,’ उनले थपे । 

बेलायत, अमेरिका र जर्मनीले युक्रेनलाई ट्यांक दिने प्रतिज्ञा गरेका छन् । तर ती ट्यांकहरू ढिलो गरी मात्र आइपुग्नेछन् । 

नेटो सदस्य फ्रान्सले आफ्ना लडाकू विमान युक्रेनलाई दिन सकिने संकेत दिएको छ । तर फ्रान्सले भारी हतियार युक्रेनलाई उपलब्ध गराउन अनकनाइरहेको स्थिति छ ।