नेपाली कांग्रेस, नेकपा (माओवादी केन्द्र), जनता समाजवादी पार्टी र नेकपा एकीकृत समाजवादीबीच चुनावअघिको गठबन्धन ब्युँताउने भद्र सहमति जुटेको छ । 

प्रधानमन्त्री निवास बालुवाटारमा शुक्रवार बसेको चार दलका नेताहरूको बैठकले पुरानो गठबन्धन ब्युँताउने सैद्धान्तिक सहमति गरेको एक नेताले जानकारी दिए । 

बैठकमा सहभागी नेकपा एकीकृत समाजवादीका उपमहासचिव प्रकाश ज्वालाले पुरानो गठबन्धन ब्युँताउने सैद्धान्तिक सहमति भएको जानकारी दिए ।

‘पुरानो गठबन्धनका दलहरू मिलेर जाने कुरामा सैद्धान्तिक सहमति भयो । राष्ट्रपतिको कुरा मिल्न बाँकी छ,’ ज्वालाले लोकान्तरसँग भने, ‘राष्ट्रपतिमा हाम्रो पनि दाबी रह्यो, कांग्रेसको पनि दाबी छ । साँझ ५ बजे बसेर टुंग्याउने सहमति भएको छ ।’

कांग्रेस महामन्त्री गगन थापाले पनि राष्ट्रपति चुनावमा साझा निष्कर्षमा पुग्ने बताएका थिए । स्रोतका अनुसार बैठकमा प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले राष्ट्रपति चुनावका चार दल मिलेर जानुपर्ने बताएका थिए । उनले राष्ट्रपतिका लागि माधव नेपालको नाम प्रस्ताव गरेको नेता ज्वालाले बताए ।

कांग्रेस र एसले राष्ट्रपतिमा दाबी गरेपछि पार्टीभित्र आन्तरिक छलफल गर्ने भन्दै नेताहरू बालुवाटारबाट बाहिरिएका थिए । राष्ट्रपति चुनावसँगै दलहरूबीच शक्ति बाँटफाँटबारे पनि छलफल भएको थियो । 

बैठकमा प्रधानमन्त्री प्रचण्ड, कांग्रेस सभापति शेरबहादुर देउवा, नेकपा एसका अध्यक्ष माधव नेपाल र जसपा अध्यक्ष उपेन्द्र यादव लगायत सहभागी थिए ।

फागुन २५ गते हुने राष्ट्रपति निर्वाचनका लागि भोलि शनिवार उम्मेदवारी मनोनयन गर्ने कार्यसूची छ ।