नेकपा एमाले विभाजन भएर गठन भएको नेपाल कम्युनिस्ट पार्टी एकीकृत समाजवादी (एस)लाई नेकपा एमालेले औपचारिक मान्यता दिएको छ । 

नेकपा एसका अध्यक्ष माधव नेपाललाई सम्बोधन गरेर एमाले अध्यक्ष केपी शर्मा ओलीले पत्राचार गरेपछि एमालेले पहिलोपटक एसको अस्तित्व स्वीकार गरेको हो । 

राष्ट्रपतिमा आफ्नो पार्टीका उम्मेदवार सुवास नेम्वाङलाई समर्थन गर्न आग्रह गर्दै ओलीले शनिवार विभिन्न दललाई पत्राचार गरेका थिए । 

त्यस क्रममा नेकपा एसका अध्यक्ष माधव नेपाललाई पनि पत्र पठाइएको थियो । 

२०७८ साउनमा एमाले विभाजन भएर नेकपा एस गठन भएको थियो । सोही वर्षको मंसिरमा भएको महाधिवेशनमा एमालेले एसलाई निमन्त्रणा दिएको थिएन । 

पार्टीले कारबाही गरेका सांसदले गठन गरेको दल अवैध भएको भन्दै एसलाई एमालेले महाधिवेशनमा निमन्त्रणा दिएको थिएन । नेपाली कांग्रेसको महाधिवेशनका क्रममा ओली र माधव नेपाल एउटै मञ्चमा उपस्थित भए पनि बोलेका थिएनन् । 

गत पुस ११ गते प्रधानमन्त्री पुष्पकमल दाहाल ‘प्रचण्ड’को शपथग्रहण समारोहमा ओली र नेपालबीच लामो समयको संवादहीनता तोडिएको थियो । राष्ट्रपति निर्वाचनको सन्दर्भमा ओलीले माधव नेपालको नाम समेत प्रस्ताव गरेका थिए । 

पार्टी एकता गर्ने र माधव नेपाललाई राष्ट्रपति बनाउने ओलीको योजना भने सफल हुन सकेन । परिस्थिति बदलिएकाले माधव नेपालको पार्टीसँग सम्बन्ध विस्तारको काम अगाडि बढेको एमालेका नेताहरू बताउँछन् । 

हेर्नुहोस्, पत्र :