क्रिकेटर सन्दीप लामिछानेको मुद्दामा आजको सुनुवाइ शुरु भएको छ । आइतबार जस्तै सोमबार पनि बन्द इजलासमा सुनुवाइ शुरु भएको हो । 

लामिछानेका तर्फबाट केही कानून व्यवसायीले बहस गर्न बाँकी रहेकोले उक्त मुद्दालाई हेर्दाहेर्दैमा राखिएको थियो । 

लामिछाने कारागारमा धरौटी तारेखमा रहने वा नरहने, विदेश जान पाउने वा नपाउने भन्ने विषयमा सर्वोच्च अदालतमा सुनुवाइ भइरहेको हो ।

सर्वोच्च अदालतका न्यायाधीशद्वय सपना प्रधान मल्ल र कुमार चुडालको संयुक्त इजलासमा तोकिएको पेशीका क्रममा आज सरकारी पक्षबाट तथा लामिछानेका तर्फबाट केही कानून व्यवसायीले बहस गरेका थिए ।

सर्वोच्चले उनलाई विदेश पनि जान पाउने गरी बाटो खोले उनी पपुवा न्युगिनी र युएईविरुद्धको सिरिज खेल्न युएई जान पाउनेछन् । 

सन्दीपले विश्व क्रिकेट लिग २ मा  सहभागिताका लागि निवेदन दिएका थिए । यसमा शुक्रवार न्यायाधीश ईश्वरप्रसाद खतिवडाको एकल इजलासले अग्राधिकार दिएर संयुक्त इजलासमा पेशी तोक्न आदेश गरेको थियो ।

उच्च अदालत पाटनले लामिछानेलाई धरौटीमा रिहा गर्नेगरी आदेश दिएपछि सन्दीप छुटेका थिए । सरकारले सर्वोच्च अदालतमा गरेको पुनरावेदनको निवेदन तथा लामिछानेले यूएई जान पाऊँ भन्दै दिएको निवेदनसमेत साथै राखेर सुनुवाइ भइरहेको हो ।