०७ असार २०८३, आइतबार
रुसको निजी सैन्य समूह वाग्नर ग्रुपले युक्रेनको बाखमुत शहर पूर्ण रूपमा नियन्त्रणमा लिएको दाबी गरेको छ ।
तर युक्रेन सरकारले आफ्ना सैनिकहरू त्यस शहरमा अझै पनि लडिरहेको जनाएको छ ।
महिनौंदेखि उक्त शहरलाई नियन्त्रणमा लिनका लागि गरेको प्रयास सफल भएको वाग्नरका प्रमुख येभ्गेनी प्रिगोजिनले बताए । आफ्ना सैनिकहरूले त्यहाँको प्रशासनिक भवनमा रुसी झण्डा फहर्याएको उनको भनाइ छ ।
‘कानूनी दृष्टिले हेर्दा बाखमुत लिइसकिएको छ । शत्रु अहिले पश्चिमी भागमा भेला भएको छ,’ प्रिगोजिनले अडियो सन्देश प्रवाह गर्दै बताए ।
युक्रेनका राष्ट्रपति भोलोदीमीर जेलेन्स्कीले बाखमुतमा लडाइँ निकै चर्केको बताए ।
