जिल्ला प्रशासन कार्यालय काभ्रेपलाञ्चोकले जिल्लास्थित राजमार्गमा गुड्ने मालवाहक सवारीलाई अनिवार्यरूपमा भारमापन गर्न निर्देशन दिएको छ ।

कार्यालय, यातायात व्यवसायी तथा सरोकारवालाको छलफलमा बिहीवारदेखि अनिवार्यरूपमा भारमापन गर्न निर्देशन दिइएको हो ।

विक्रम संवत् २०७८ पुसमा काभ्रेका ३ स्थान पाँचखाल नगरपालिकाको केराघारी, पनौती नगरको नैकिन्टार र नमोबुद्ध नगरको भकुण्डेमा भारमापन केन्द्र (तौलपुल) व्यवस्थित गरिएको थियो । त्यसयता व्यवसायीले आनाकानी गर्दै आएका थिए ।

मालबाहक सवारीसाधनको भारमापन नगर्दा जिल्लास्थित राजमार्गका सडक जीर्ण बन्दै गएका छन् । 

गृह मन्त्रालयले जिल्लाका तौलपुल सञ्चालनमा ल्याउन परिपत्र गरेपछि कार्यालयले सोमवार सरोकारवाला निकायका प्रतिनिधिलाई छलफलका लागि डाकेको थियो । प्रमुख जिल्ला अधिकारी पुण्यविक्रम पौडेलले आउने बिहीवारदेखि मालबाहक सवारीसाधनलाई अनिवार्यरूपमा भारमापन गर्न निर्देशन दिइएको बताए ।

‘अब जसरी भए पनि तौलपुल सञ्चालन गर्ने हो, मालबाहक सवारीलाई अनिवार्यरूपमा भारमापन गर्न लगाइनेछ,’ उनले भने ।

तीनै स्थानीय तहले भारमापन केन्द्र सञ्चालन गरी ‘लोडसिट’ लिई ढुवानी गर्न/गराउन आग्रह गर्दै आएका थिए । पनौती र पाँचखाल नगरले भारमापन सेवाका लागि जिम्मेवारी लिएको ग्लोबल मशिनरी एन्ड टेक्नोलोजी सर्भिसेज प्रालिलाई र नमोबुद्ध नगरले कोटकालिका मशिनरी एन्ड टेक्नोलोजी सर्भिसेज प्रालिलाई मालबाहक सवारीसाधनको अनिवार्य भारमापन गरी गर्न/गराउन निर्देशन दिँदै आएका थिए । 

भारवहन नियमन सम्बन्धी निर्देशिका २०७४ (संशोधनसहित) को व्यवस्था, यातायात विभागको पत्र र जिल्ला प्रशासन कार्यालय काभ्रेपलाञ्चोकद्वारा २०७८ फागुनमा जारी पत्रानुसार स्थानीय तहले भारमापन कार्यलाई कडाइ गरे पनि भारमापन हुनसकेको थिएन । ‘दुर्घटना न्यूनीकरण तथा सडक सुरक्षाका लागि पनि मालबाहक सवारीमा भारमापनमा कडाइ गर्नुपर्ने देखियो,’ प्रजिअ पौडेलले भने । 

मालबाहक सवारीसाधनले इच्छाअनुसार मात्रै भारमापन गर्ने गरेको ग्लोबल मशिनरी एन्ड टेक्नोलोजी सर्भिसेज प्रालिका सरोज कुइँकेलले बताए । उनका अनुसार सबै मालबाहक सवारीले भारमापन गर्ने हो भने सडक सुरक्षामा निकै मद्दत पुग्नेछ । निर्देशिकाअनुसार ६ पांग्रेभन्दा माथि क्षमताका मालबाहक सवारीसाधनले अनिवार्य भारमापन गर्नुपर्ने हुन्छ । तौलपुलमा भारमापन गरेबापत प्रतिसवारीले १५० तिर्नुपर्ने नियम बनाइएको छ । 

जिल्लास्थित दक्षिणी क्षेत्र बनेपा–खोपासी सडक, उत्तरी क्षेत्रको हेलम्बु राजमार्ग तथा अरनिको र विपी राजमार्गमा दैनिक करीब २ हजार निर्माण सामग्री लगायतका मालबाहक सवारीसाधन चल्ने गर्दछन् । मालबाहक सवारीले क्षमताभन्दा बढी भार बोक्दा पक्की सडक समेत बर्सेनि जीर्ण हुने गरेका छन् ।