०७ साउन २०८३, बिहीबार
चाबहिलको सरस्वतीनगरमा भाँडा पसल सञ्चालन गर्ने नीरा पाण्डे आचार्यको हत्या पसलमा कसैले गर्यो कि बाहिर हत्या गरेर ल्याइयो भन्ने विषयमा प्रहरीले अनुसन्धान गरिरहेको छ ।
अनुसन्धानमा खटिएका अधिकारीहरूका अनुसार दिउँसो घटना हुँदा अरूले थाहा नपाउने अवस्था कसरी आयो भन्ने विषयमा अनुसन्धान गरिरहेको छ ।
‘हामीले मर्डर अन्तै भएको हो कि त्यहीँ हो भन्ने विषयमा अनुसन्धान गरिरहेका छौं,’ ती अधिकारीले लोकान्तरसँग भने ।
काठमाडौं प्रहरी परिसरका प्रमुख वरिष्ठ प्रहरी उपरीक्षक (एसएसपी) दानबहादुर कार्कीका अनुसार अहिले सबै कोणबाट अनुसन्धान भइरहेको छ ।
‘हामीले सबै कोणबाट अनुसन्धान गरिरहेका छौं । तर अहिलेसम्म ठोस रूपमा केही प्रमाणहरू भेटिएका छैनन्,’ एसएसपी कार्कीले लोकान्तरसँग भने ।
प्रहरीले अहिले उपत्यकाका सबै सीसीटीभी क्यामेराको अनुसन्धान गरिरहेको छ । प्रहरीका अनुसार सीसीटीभीको फूटेजका अनुसार केही शंकास्पद व्यक्तिको पहिचान भएको छ ।
काठमाडौं उपत्यका अपराध अनुसन्धान कार्यालयका प्रमुख एसएसपी डा. मनोज कार्कीका अनुसार प्रहरीले सुक्ष्म ढंगबाट अनुसन्धान गरिरहेको छ ।
‘हामीले प्राविधिक र म्यनुअल सबै पाटोबाट अनुसन्धान गरिरहेका छौं, तर अनुसन्धान भइरहेकाले अन्य कुरा भन्ने कुरा भएन,’ एसएसपी डा. कार्कीले भने ।
नीरा वैशाख ७ गते दिउँसो चाबहिलमा रहेको आफ्नै पसलमा रगताम्मे अवस्थामा फेला परेकी थिइन् । काठमाडौंमा उनका दुईवटा पसल रहेका छन् ।
एउटा पसल उनका पति योगेश आचार्यले हेर्छन् । निरु भाँडा पसल भने उनी आफैँले सञ्चालन गर्दै आएकी थिइन् । उनीहरू बाग्लुङको बडिगाड गाउँपालिकाका स्थायी बासिन्दा हुन् ।
