२८ जेठ २०८३, बिहीबार
नक्कली शरणार्थी प्रकरणका मुख्य अभियुक्तमध्ये एक मानिएका केशव दुलालका वकिलहरूले उनी आफैं पीडित रहेको जिकिर गरेका छन् ।
काठमाडौं जिल्ला अदालतका न्यायाधीश प्रेमप्रसाद न्यौपानेको इजलासमा जारी बहसमा दुलालका तर्फबाट बहस गरेका कानून व्यवसायीहरूले कसूर प्रमाणित नहुने जिकिर गरेका हुन् ।
'दुलाल आफैं पीडित हुन् । अभियोग लगाइएका कुनै पनि कसूरमा संलग्न छैनन् र कसूर प्रमाणित पनि हुँदैन । आफैं ठगिएका हुन् । सकेसम्म साधारण तारेखमा राखियोस्,' उनको पक्षमा बहस गरेका ६ जना वकिलले नै जोड दिएर भने ।
दुलालको पक्षमा वरिष्ठ अधिवक्ता योगेन्द्रबहादुर भट्टराई तथा अधिवक्ताहरू विकास भट्टराई, विकास थापा, विश्वास आचार्य, नरबहादुर योगी र राजन भट्टराईले बहस गरे ।
दुलालको बहस सकिएपछि अहिले अर्का अभियुक्त सानु भण्डारीको तर्फबाट बहस जारी छ ।
खाजा ब्रेकअघि अधिवक्ता विनोद शर्माले बहस गरेका छन् ।
