प्रस्तावित प्रधानन्यायाधीश हरिकृष्ण कार्कीले संसदीय सुनुवाइ समितिको बैठकमा भइरहेको प्रश्नोत्तरमा आरोप लगाएर बदनाम गर्ने कार्य स्वीकार्य नहुने जवाफ दिएका छन् ।

सांसदहरूले सोधेका प्रश्नको जवाफ दिने क्रममा कार्कीले फैसलाको विश्लेषणात्मक आलोचना गर्न आग्रह गरे ।

उनले भने, ‘म कतिपय प्रश्नको उत्तर यहाँ दिन सक्दिनँ । कतिपय फैसलाप्रति लक्षित गरेर आलोचना गरिएको प्रश्नको उत्तर दिन सकिँदैन । हाम्रा फैसलाको विश्लेषणात्मक आलोचना गर्नुपर्छ, विधिशास्त्रको अध्ययन, दर्शन सिद्धान्त र मूल्य मान्यतामा हुनुपर्छ । आरोप लगाएर बदनाम गर्ने कार्य स्वीकार्य हुँदैन ।’

सुनुवाइ समितिमाथि नै प्रश्न गरिएको सन्दर्भमा उनले त्यो आफ्नो धारणा नभएको स्पष्ट पारे । उनले भने, ‘मेरै नेतृत्वमा गठित समितिको प्रतिवेदनमा संसदीय सुनुवाइ समितिको बारेमा प्रश्न आएको थियो । त्यही कुरा मैले यहाँ राखेको हो । मेरो आफ्नो कुरा होइन त्यो । संवैधानिक परिषद्, न्याय परिषद्को संरचना नै परिवर्तन गर्ने हो कि संविधान नै संशोधन गर्ने हो कि भन्ने कुरा आएकाले त्यहाँ राखिएको हो, मेरो आफ्नो धारणा होइन ।’