२३ जेठ २०८३, शनिबार
पहिरोमा परी ताप्लेजुङमा एकै घरका ३ जनासहित ४ जना बेपत्ता भएका छन् ।
सिदिङ्वा गाउँपालिका–६ मेहेलेमा एकै घरका ३ जना र अर्का १ जना बेपत्ता भएका हुन् । मेहेलेको भालुुखोपमा गएको पहिरोमा परी स्थानीय यादव बुढाक्षेत्रीकी पत्नी भगिमाया बुडाक्षेत्री, बुहारी सन्ध्या बुढाक्षेत्री र नाति प्रज्वल बुढाक्षेत्री बेपत्ता भएका छन् ।
यादव घरबाहिर थिए । भालुखोपकै पहिरोमा परी स्थानीय गणेश तामाङ बेपत्ता भएका छन् ।
बेपत्ताहरूको खोजी तथा उद्धारका लागि जनशक्ति परिचालन गरिएको ताप्लेजुङका प्रमुख जिल्ला अधिकारी (सीडीओ) गोमादेवी चेम्जोङले बताइन् । उनले अविरल वर्षाका कारण उद्धार कार्यमा समस्या भएको बताएकी छन् ।
मेची राजमार्ग अन्तर्गत पाँचथरको हेवाखोलामा रहेको मोटरेबल पुल बगाउँदा ताप्लेजुङ जिल्लाको तराईका जिल्लासँगको सडक सम्पर्क अवरुद्ध भएको ताप्लेजुङका प्रहरी प्रमुख (डीएसपी) राजन लिम्बूले बताए ।
