काठमाडौं, २७ भदौ— नेपाल प्रहरीका डिआईजी नवराज सिलवालले सेवाबाट अगल भएको घोषणा गरेका छन् ।
मंगलबार साँझ एक विज्ञप्ति जारी गर्दै सिलवालले प्रहरी सेवाबाट अलग भएको घोषणा गरेका हुन् ।

आजै आइजीपी प्रकरणमा सर्वोच्च अदालतले डिआइजी सिलवालको रिट खारेज गरेको थियो । सरकारको निर्णय सदर गर्दै सर्वोच्च अदालतको पूर्ण इजलासले सिलवालको रिट खारेज गरेको हो ।
सरकारले आइजीपी नियुक्तीमा आफूलाई अन्याय गरेको भन्दै  सिलवाल सर्वोच्च अदालत गएका थिए । 

अदालतले रिट खारेज गरेसँगै सिलवालले जारी गरेको विज्ञप्तिमा भनिएको छ— झट्ट हेर्दा इतिहासको कुनै कालखण्डमा सत्यको पराजय भएको जस्तो देखिएतापनि इतिहासले त्यसको मूल्यांकन गर्ने नै हुँदा म सबै साथीहरुलाई निराश नभई मुलुकप्रतिको जिम्मेवारीमा लागिरहन सल्लाह दिन चाहन्छु र यस घटनाको समुचित समीक्षा गर्ने जिम्मा इतिहासलाई नै छाडिदिन उचित ठान्दछु।
उनले आगामी दिनमा प्रहरी सेवामा नरहेपनि नेपाल प्रहरीको उन्नती र प्रगतिमा सहयोगी भूमिकामा रहने पनि बताएका छन् । यस्तै आफूले सत्य र न्यायको लागि लडेको दाबी समेत गर्दै सिलवालले इमान्दार, अनुशासित र कर्तब्यनिष्ठ भएर कार्य गर्दा अन्यायमा पर्ने जोखिम हुने रहेछ भनेर हतोत्साहित नहुन सकल दर्तालाई सुझाव दिएका छन् ।
उनले एक कर्तब्यनिष्ट सिपाहीमाथि बदनियत राख्दा शासक वर्गको पनि निद हराम हुने र जनताबाट दण्डित हुनुपर्ने अवस्था आउन सक्ने हेक्का राख्न समेत चेतावनी दिएका छन् ।
उनले आफू आईजीपी हुन नपाएपनि देशबासी र प्रहरीहरुले देखाएको सद्भाव र मायाले त्यो भन्दा उच्चकोटीमा राखेको समेत उल्लेख गरेका छन् ।