नुवाकोट जन्म तथा घर भई हाल काठमाडौँमा सञ्चार क्षेत्रमा क्रियाशील सञ्चारकर्मीको आजको भेलाले रमेश जम्मकट्टेलको नेतृत्वमा नौ सदस्यीय ‘नुवाकोट–काठमाडौँ पत्रकार समाज’ गठन गरेको छ ।

साउन १५ को ‘खीर खाने संस्कृति’ मनाउँदै आज अनामनगरमा आयोजित भेलाले समाजको सहसंयोजकमा नवराज घिमिरे, सदस्यमा प्रशन्न ढुङ्गाना, प्रकाश पुडासैनी, राजन ढकाल, हरिराम भेटवाल, आशिष ढुङ्गाना, प्रयास श्रेष्ठ र प्रतिमा मुडभरीलाई चयन गरेको छ । 

उक्त तदर्थ समितिले संस्थाको विधान तर्जुमा, दर्ता प्रक्रिया र भावी कार्यक्रम सञ्चालन गर्नेछ । एक दशकअघिको यस्तै भेलाले पत्रकार दिनेश आचार्यको अध्यक्षतामा तदर्थ समिति गठन गरेकामा आज पुनःगठन गरी नयाँ रूप दिइएको हो । उक्त समितिमा दुई सदस्य र आवश्यकतानुसार सल्लाहकारपछि चयन गरिनेछ ।

 भेलाको अध्यक्षता गर्दै राष्ट्रिय समाचार समिति (रासस) का नायब महाप्रबन्धक श्यामप्रसाद रिमालले जन्म जिल्लाप्रतिको सम्मान र यसको समृद्धिका लागि सञ्चारकर्मीले हातोमालो गर्नुपर्ने बताए ।

भेलामा सञ्चारकर्मी सागर गजुरेल, प्रकाश सिलवाल, रामकृष्ण पौडेल, विष्णु तारुके, माधवप्रसाद तिवारी, अनिता श्रेष्ठ, नवराज अधिकारी, राजकुमार सिग्देल, उद्धव सिलवाललगायतले समाजलाई संस्थागत र सक्रियरूपमा सञ्चालन गरी सञ्चार क्षेत्रबाट नुवाकोटको विकासमा टेवा दिन सकिनेमा जोड दिएका थिए ।