कोशी प्रदेशका मुख्यमन्त्री उद्धव थापाले आज बुधवार बिहान साढे १० बजे शपथग्रहण गर्दैछन् ।

प्रदेश प्रमुखको कार्यालयले साढे १० बजेका लागि शपथ ग्रहणको तयारी भएको जनाएको छ ।

उनी मंगलवर मुख्यमन्त्रीमा नियुक्ति भएका थिए । आज बुधवारै मन्त्री नियुक्त गर्ने थापाको तयारी छ । पुरानै मन्त्रीहरूलाई निरन्तरता दिने उनले बताए ।

मन्त्री नियुक्तिबारे माओवादीभित्र भने विवाद छ । प्रधानमन्त्री पुष्पकमल दाहाल ‘प्रचण्ड’का ज्वाइँ समेत रहेका प्रदेशसभा सदस्य जीवन आचार्यलाई पटक–पटक मन्त्री बनाउन नहुने मत माओवादीभित्र बलियो छ तर पनि शक्तिको आडमा उनलाई मन्त्री बनाउने तयारीमा थापा रहेको स्रोतले जनाएको छ ।

निवर्तमान मुख्यमन्त्री हिक्मत कार्की नेतृत्वको सरकार ढाल्न र उद्धव थापा नेतृत्वको सरकार बनाउन २ पटक नै आचार्यले भूमिका खेलेको भन्दै उनलाई मन्त्री बनाउने तयारीमा मुख्यमन्त्री थापा रहेका माओवादीकै एक सांसदले बताए ।

आचार्यलाई मन्त्रीमा सिफारिस गर्न थापाले माओवादीका नेताहरूसँग अनुरोध गरेको एक नेताले आफ्नो नाम नखुलाउने शर्तमा बताए । 

यसअघि कांग्रेसबाट प्रदीपकुमार सुनुवार, रामकुमार खत्री, माओवादीबाट जीवन आचार्य, राजेन्द्र कार्की मन्त्री बनेका थिए । उनीहरूमध्ये आचार्यले आर्थिक मामिला तथा योजना मन्त्रीको जिम्मा पाए पनि अरू मन्त्रीहरू जिम्मेवारीविहीन थिए ।

प्रदेश प्रमुख पर्शुराम खापुङले संविधानको १६८ को उपधारा २ अनुसार कांग्रेस, माओवादी केन्द्र, एकीकृत समाजवादी र जसपाको समर्थन पाएका थापालाई मंगलवार मुख्यमन्त्री नियुक्त गरेका हुन् ।

यसअघि असार २१ गते पहिलोपटक कोशी प्रदेशको मुख्यमन्त्री नियुक्त भएका थापालाई सर्वोच्च अदालतले साउन ११ गते बिहीवार पदमुक्त गरेको थियो । मुख्यमन्त्री दाबी गर्दा प्रदेशसभा सभामुखको समेत हस्ताक्षर संलग्न गराएको विषयलाई सर्वोच्च अदालतले असंवैधानिक ठहर गर्दै नियुक्ति बदर गरेको थियो ।

यसपटक सभामुख बाबुराम गौतमले राजीनामा दिएर उनलाई बहुमत पुग्ने बाटो खोलिदिएका थिए ।

उनको हस्ताक्षरकै कारण अदालतले मुख्यमन्त्री थापालाई बर्खास्त गरेपछि उनको राजीनामा सत्ता गठबन्धनका निम्ति अन्तिम विकल्प बनेको हो । २६ दिनमा दोस्रोपटक मुख्यमन्त्री बनेका थापाले विश्वासको मत लिन भने चुनौती छ ।