छोरीलाई विष खुवाएर हत्याको प्रयास गरेको आरोपमा एक जना पक्राउ परेका छन् ।

पक्राउ पर्नेमा सुनसरीको बर्जु गाउँपालिका २ का अर्जुन कामत रहेका छन् । उनले गए राति किरा मार्न प्रयोग गरिने औषधि खुवाएर छोरीको हत्या गर्न खोजेका प्रहरीले जनाएको छ ।

इलाका प्रहरी कार्यालय दुहबीका प्रमुख प्रहरी निरीक्षक बुद्धिकुमार चौलागाँईका अनुसार आफ्नै छोरीलाई विष खुवाएर हत्या गर्न खोजेपछि उनलाई बुधवार बिहान पक्राउ गरिएको हो ।

२० वर्षीय छोरी राधिका कामतलाई उनले विष खुवाएका थिए । ‘मादक पदार्थले लट्ठ बनेर घर पुगेका अर्जुनले छोरीलाई जबरजस्ती समातेर विष खुवाएका रहेछन्,’ चौलागाँइले भने,  ‘बारम्बार रक्सी सेवन गरी छोरीलाई कुटपिट गर्ने गरेका पनि अनुसन्धानबाट खुलेको छ ।’

राधिकाको अहिले कोशी अस्पताल विराटनगरको आइसीयुमा उपचार भइरहेको छ । 

बाबुले कुटपिट गर्ने गरेका कारण राधिका साथीकोमा जाने गरेकी थिइन् । छोरी अर्काको घरमा बस्दा आफ्नो बेइज्जत भएको भन्दै अर्जुनले विष खुवाएको प्रहरीको अनुसन्धानबाट खुलेको छ ।

थप अनुसन्धान भइरहेको प्रहरीले जनाएको छ ।