११ साउन २०८३, सोमबार
अजित खड्काको नेतृत्वमा १३ सदस्यीय प्रदेश समिति चयन गर्दै विवेकशील साझा पार्टीको बागमती प्रदेश अधिवेशन सकाएको छ ।
प्रदेश निर्वाचन आयोगका प्रमुख शंकर बञ्जाडेका अनुसार अध्यक्षमा खड्का, उपाध्यक्षमा डिजेन बस्नेत, सचिवमा शकिल अहमद र कोषाध्यक्षमा दिलकुमार केसी निर्वाचित भएका छन् ।
अधिवेशनले बागमती प्रदेश सदस्यमा प्रेमप्रसाद वस्ती, आशिष कार्की, पूर्णलाल श्रेष्ठ, वैकुण्ठ दाहाल, शारदालक्ष्मी प्रधान, मधुसुदन कार्की, नरेन्द्र श्रेष्ठ, अशोक अधिकारी र भूषणकुमार श्रेष्ठलाई चयन गरेको छ ।
प्रमुख बञ्जाडेका अनुसार निर्वाचनमा ’नो भोट’को पनि अभ्यास गरिएको थियो । नव निर्वाचित पदाधिकारी तथा सदस्यहरूलाई प्रमाणपत्र वितरण एवं पद तथा गोपनीयताको सपथ ग्रहण गराइएको प्रदेश अधिवेशन आयोजक समितिका संयोजक सुरज प्रधानले जानकारी दिए ।
विवेकशील साझा पार्टीको दोस्रोे प्रादेशिक अधिवेशन कोशी प्रदेशमा हुने तय भएको छ । यही असोज दोस्रो साता कोशी प्रदेश अधिवेशन गर्न लागिएको प्रदेश अधिवेशन आयोजक समितिका संयोजक सुदन श्रेष्ठले जानकारी दिए ।
रवीन्द्र मिश्रले पार्टी छोडेर राष्ट्रिय प्रजातन्त्र पार्टी (राप्रपा)मा गएपछि अहिले केन्द्रीय नेतृत्वमा समीक्षा बाँस्कोटा छिन् ।
