नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले प्रमुख प्रतिपक्षी दल नेकपा एमालेभित्र धाँजा परेको टिप्पणी गरेका छन् ।

नेतृत्व (अध्यक्ष केपी ओली)का कारण कार्यकर्ता हैरान भएर विस्फोट हुने अवस्था आएको उनले दाबी गरे ।

समाजवादी मोर्चाको कर्णाली प्रदेश भेलालाई बिहीवार सुर्खेतमा सम्बोधन गर्दै प्रचण्डले प्रमुख प्रतिपक्षी दल एमालेभित्र तीव्र असन्तुष्टि बढेको बताएका हुन् ।

‘म अहिले नाम लिएर भन्दिनँ, आफूलाई ठूलो पार्टीको नेता भन्नेका कारण प्रतिपक्षभित्र यति ठूलो धाँजा परेको छ, नेताको विशाल पंक्ति र कार्यकर्ता हैरान/परेसान भएर भएर कहीँ न कहीँ विस्फोट हुने अवस्थामा पुगेको छ । त्यसबाट कम्युनिस्ट आन्दोलनको नयाँ धु्रवीकरण शुरू हुने मेरो विश्वास छ,’ प्रचण्डले भने । 

प्रधानमन्त्री प्रचण्डले जनता सडकमा आएकै कारण प्रतिनिधिसभा पुनःस्थापना सम्भव भएको बताए । 

‘देशलाई प्रतिगमनमा लैजान पटक–पटक सदन विघटन गरियो । हामी केही नेताले वक्तव्य दिएर रोकिनेवाला थिएन । जनता आन्दोलित भएपछि कसैले विघटनलाई साथ दिने अवस्था रहेछ,’ प्रचण्डले भने, ‘भ्रष्टाचारविरोधी यो अभियान, स्वाधिनताको अभियान जनताले मात्र रोक्न सक्छन् ।’

सरकारले गरेको राम्रो कामका कारण गठबन्धन र मोर्चा भत्काउन विरोधीहरू धुप हालेर लागिपरेको उनले बताए ।