०२ साउन २०८३, शनिबार
सत्तारुढ दलसँग यसअघि भएको सहमतिअनुसार सुन तस्करी सम्बन्धमा उच्चस्तरीय छानबिन आयोग गठनको माग गर्दै नेकपा (एमाले)का नेताहरू सिंहदरबार पुगेका छन् । एमाले नेताहरूले उपप्रधान एवं गृहमन्त्री नारायणकाजी श्रेष्ठलाई भेटेर आजै आयोग गठन गर्न दबाब दिएका छन् ।
एमाले सचेतक महेश बर्तौलाले आज जसरी पनि आयोग घोषणा गर्नुपर्ने माग गरे । ‘प्रमुख दलका शीर्ष नेताबीचमा भएको सहमतिअनुसार आजै आयोग गठन गर्नुपर्छ, नभए विश्वासघात भएको ठान्छौं,’ बर्तौलाले भने । सरकारी पक्षले भने प्रधानमन्त्री पुष्पकमल दाहाल प्रचण्ड स्वदेश फर्केपछि आयोग गठन गर्न सकिने बताएको छ ।
गृहमन्त्रीको टोली शिक्षकसँगको वार्तामा रहेकाले फेरि केहीबेरमा बस्ने सहमति भएको बर्तौलाले बताए ।
एमाले उपाध्यक्ष विष्णु पौडेल र सचेतक बर्तौला सिंहदरबार पुगेका थिए ।
एमालेले जारी राखेको संसद् अवरोध हटाउने क्रममा गत भदौ ६ गते दलहरूबीच आयोग गठन गर्ने सहमति भएको थियो ।
नेपाल प्रहरीको केन्द्रीय अनुसन्धान ब्युरो (सीर्आइबी)ले आफ्नो प्रतिवेदन बुझाइसकेपछि असोज ५ गते आयोग गठन गर्ने गरी भदौ ६ गते सहमति भएको थियो । प्रधानमन्त्री प्रचण्ड तथा प्रमुख दलका शीर्ष नेताहरूको उपस्थितिमा दलका सचेतकहरूले सहमतिपत्रमा हस्ताक्षर गरेका थिए ।
यस्तो थियो सहमति पत्र:
