२१ जेठ २०८३, बिहीबार
नेकपा एमालेका अध्यक्ष केपी शर्मा ओलीले प्रधानमन्त्री पुष्पकमल दाहाल ‘प्रचण्ड’को चीन भ्रमण उपलब्धिमूलक नभएको बताएका छन् ।
विराटनगर विमानस्थलमा शुक्रवार पत्रकारहरूसँग कुरा गर्दै अध्यक्ष ओलीले प्रधानमन्त्री प्रचण्डको विदेश भ्रमण एकदमै साधारण र फुर्सदिलो देखिएको बताएका हुन् ।
१७ दिनसम्म संसद् रोकेर गरिएको भ्रमण पनि उपलब्धिमूलक नहुनु दुर्भाग्यपूर्ण रहेको उनले बताए ।
प्रधानमन्त्रीको हैसियतमा यो प्रचण्डको अन्तिम भ्रमण पनि हुन सक्ने उनको टिप्पणी छ ।
अर्को फरक प्रसंगमा बोल्दै अध्यक्ष ओलीले देशको ठूलो दल (नेपाली कांग्रेस) नै देशप्रति गम्भीर नभएको आरोप लगाए ।
पछिल्लो राजनीतिक गतिविधिले कांग्रेसको अस्तित्व नै संकटमा पर्दै गएको उनको जिकिर छ ।
देशप्रतिको गाम्भीर्यताको अभावमा एमाले कांग्रेससँग मिल्ने कुनै सम्भावना नै नरहेको उनको भनाइ छ ।
माओवादी नेतृत्वको सरकार अपराधीको संरक्षणमा सक्रिय रहेको आरोप समेत अध्यक्ष ओलीले लगाए ।
अहिलेको सरकार देशका लागि दुर्भाग्यपूर्ण रहेको जिकिर समेत उनले गरे ।
अध्यक्ष ओली एमाले कोशी प्रदेश अधिवेशन उद्घाटनका लागि विराटनगर आएका हुन् ।
