१० साउन २०८३, आइतबार
नेकपा एमाले रुपन्देहीले जाजरकोट भूकम्पबाट प्रभावित क्षेत्र रुकुम पश्चिममा स्वयंसेवक पठाएको छ ।
गत कात्तिक १६ गते राति जाजरकोटको रामीडाँडा केन्द्रविन्दु बनाएर ६ दशमलव ४ म्याग्निच्युटको भूकम्प गएको थियो ।
उक्त भूकम्पमा परी १ सय ५४ जनाको मृत्यु भएको थियो भने तीन सय ४६ घाइते भएका थिए । भूकम्पका कारण २६ हजार ५ सय ५७ निजी घर पूर्णरुपमा ध्वस्त भएका थिए ।
त्यस्तै ३५ हजार चार सय ५५ घरमा आंशिक क्षति भएको सरकारी तथ्याङ्क छ ।
भूकम्पका कारण घरबार भत्किएर छानोविहीन भएकाहरूलाई ओतलाग्ने भरपर्दो त्रिपाल समेतको व्यवस्था नहुँदा चिसोका कारण कठ्याङ्ग्रिएर १० जना बढीको मृत्यु भइसकेको छ ।
बालबालिका, वृद्धवृद्धा, सुत्केरी, गर्भवती तथा विरामी र अशक्त व्यक्तिहरू झनै विरामी परेका छन् । एमालेले भूकम्पबाट सयौं भौतिक संरचना भत्किएर क्षति भएको पश्चिम रुकुमको आठबीसकोट नगरपालिकामा तत्कालका लागि अस्थायी घरटहरा निर्माणका लागि रुपन्देहीबाट २० जना स्वयंसेवकको टोली पठाएको जनाएको छ ।
एमाले रुपन्देहीका अध्यक्ष तेजेन्द्र केसीले मंसिर ५ गतेदेखि आगामी १७ गतेसम्म निरन्तर सर्वसाधारणका भत्किएका घरटहरा निर्माणका लागि २० जना स्वयंसेवकको टोली पठाएको बताए ।
अध्यक्ष केसीले भूकम्प प्रभावित क्षेत्रमा काम गर्न आवश्यक पर्ने गैँती, बेल्चा, हाते आरा, हथौडा, खुर्पा लगायतका औजार तथा स्वयंसेवकहरूको सुरक्षँको लागि ज्याकेट, पञ्जा, हेलमेट लगायतका आवश्यक सामग्री र खाने बस्ने खर्च समेतको व्यवस्था गरी पठाइएको जानकारी दिए ।
अध्यक्ष केसीले यसअघि २०७२ सालको भूकम्पबाट ध्वस्त बनेका संरचनाको पूनर्निर्माणको लागि समेत स्वयंसेवक खटाइएको उल्लेख गर्दै अहिले पनि त्यति बेला काममा खटिएका अनुभवी स्वयंसेवकहरूलाई पठाइएको जानकारी दिए ।
विगतमा जस्तै यसपटक पनि भूकम्प प्रभावित क्षेत्रका बासिन्दाको घाउमा मलम लगाउने गरी अनुशासित भएर काम गरेर फर्किन निर्देशन दिए । नेकपा एमालेले यसअघि नै भूकम्प प्रभावित क्षेत्रमा एकहजार एकसय जना स्वयंसेवक परिचालन गरिसकेको जनाएको छ । स्वयंसेवकहरूले भूकम्पले भत्काएका घरभित्रका सामानहरू निकाल्ने, भग्नावशेष पन्छाउने र जमिन सम्याएर अस्थायी घरटहरा बनाउने काम शुरू गरेका छन् ।
पार्टी केन्द्रको तर्फबाट १ हजार र प्रदेशका १ सय गरी ११ सय स्वयंसेवक भूकम्प प्रभावित जिल्ला जाजरकोट र पश्चिम रुकुममा खटिएको रुपन्देही अध्यक्ष केसीले जानकारी दिए ।
जाजरकोटमा ७ सय र रुकुम पश्चिममा ४ सय स्वयंमसेवक परिचालन भएका छन् ।
एमालेका जनसंगठनहरू नेपाल ट्रेड युनियन महासंघ जिफन्ट, अनेरास्ववियु, राष्ट्रिय युवा संघ नेपाल, राष्ट्रिय खेलकुद महासंघ तथा पार्टीका प्रदेश कमिटीबाट दक्ष जनशक्ति सहितको स्वयंसेवकहरूको टोलीलाई २८ वटा समूहमा विभाजन गरि मंसिर १ गतेदेखि नै खटाइएको एमाले पोलिटब्युरो सदस्य तथा जिफन्टका अध्यक्ष विनोद श्रेष्ठले जानकारी दिए ।
एमालेले २०७२ सालको भूकम्पमा पनि स्वयंसेवक परिचालन गरी २७ हजार २७६ अस्थायी घरटहरा र १३ सयभन्दा बढी विद्यालयका अस्थायी संरचना निर्माण गरेको थियो ।
