काठमाडौं जिल्ला अदालतले बाँसबारी छाला जुत्ता कारखानाको जग्गा हडपेको आरोपमा पक्राउ परेका अरुण चौधरीसहित तीनै जनाको अनुसन्धान मंगलवारसम्म सक्न आदेश दिएको छ ।​​​​

सोमवार जिल्ला न्यायाधीश यज्ञप्रसाद आचार्यको इजलाशले बयान सम्पन्न भइसकेको तथा बुझ्नु पर्ने काम भोलिसम्म सक्न आदेश गरेको हो ।

प्रहरी हिरासतमै राखेर अनुसन्धान गर्नका लागि सरकारी वकिलले विभिन्न ८ आधार पेश गरे पनि भोलि (मंगलवार) सम्म बुझ्नु पर्ने सबै काम सम्पन्न गरी तीनै जनलाई हाजिरी जमानीमा छाड्न आदेश भएको हो ।​​​​​

प्रवादीसँग बुझ्न पर्ने वा कुनै कागज गराउन पर्ने भएमा आजको मितिसमेत लागू हुने गरी २ दिनभित्र अनुसन्धानको काम सम्पन्न गर्न आदेशमा भनिएको छ ।

यस्तै, अनुसन्धानको काम बाँकी रहे हाजिर जमानीमा राखेर अनुसन्धानको प्रक्रिया टुंग्याउन पनि अदालतले आदेश गरेको हो ।

छाला जुत्ता कारखानाको १० रोपनी जग्गा हडपेको आरोपमा उद्योगी चौधरीसहित अजितनारायण सिंह थापा र सञ्जय ठाकुर पनि पक्राउ परेका छन् ।

अदालतले सोमवार नै उनीहरू तीनै जनालाई थप २ दिन हिरासतमा राख्न अनुमति दिएको छ । 

छाला जुत्ता कारखानाको जग्गा हडपेको आरोपमा उनीहरूलाई ५ दिन अगाडि पक्राउ गरेर प्रहरीको केन्द्रीय अनुसन्धान ब्यूरो (सीआईबी)ले अनुसन्धान गरिरहेको छ ।