प्रधानसेनापति प्रभुराम शर्माले सहायक सेनानी पदमा बढुवा भएका प्रमुख सुवेदार र सुवेदारहरूलाई दर्ज्यानी चिन्ह प्रदान गरेका छन् ।​

मंगलवार जङ्गी अड्डामा आयोजित एक कार्यक्रमका बीच प्रधानसेनापति शर्माले साधारण सेवातर्फ रिक्त पदमा बढुवा भएकाहरूलाई दर्ज्यानी चिन्ह प्रदान गरेका हुन् ।

सैनिक सेवा नियमावली २०६९ बमोजिम नेपाली सेनामा साधारण सेवातर्फ रिक्त सहायक सेनानी पदमा पदपूर्ति गर्दा ७० प्रतिशत खुल्ला, २० प्रतिशत आन्तरिक प्रतिस्पर्धा र १० प्रतिशत बढुवामार्फत गर्नुपर्ने व्यवस्था छ ।​

सोही अनुसार बढुवा भएका प्रमुख सुवेदार/सुवेदार ३२ जना मध्ये विभिन्न संयुक्त राष्ट्र संघीय मिसन (शान्ति सेना)मा खटिएका ९ जनाबाहेक २३ जनालाई आज दर्ज्यानी चिन्ह प्रदान गरिएको हो ।

उक्त अवसरमा प्रधानसेनापतिसँगै बलाधिकृत रथी अशोकराज सिग्देलले पनि पदोन्नति भएकाहरूलाई सहायक सेनानी दर्जाको दर्ज्यानी चिन्ह प्रदान गरेका थिए ।

समारोहमा रथीवृन्द, अधिकृतहरूका साथै बढुवा भएका अधिकृतहरूका परिवारको उपस्थिति थियो ।

लामो समय सेनामा रहेर योगदान पुर्‍याएका एवं अनुभवी पदिकहरूको अधिकृत दर्जामा बढुवाको व्यवस्थाले आन्तरिक वृत्ति विकासमा राम्रो अवसर सृजना गरेको सेनाले जनाएको छ ।