‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–

चौधरी ग्रुपले हडपेको बाँसबारी छालाजुत्ता उद्योगको १० रोपनी जग्गा फिर्ता ल्याउन सरकारले आवश्यक प्रक्रिया अघि बढाएको छ । भूमिसुधार तथा मालपोत कार्यालय डिल्लीबजारले च्याम्पियन फुटवेयर प्रालिलाई पत्र काट्दै जग्गा नेपाल सरकारको नाममा स्रेस्ता अध्यावधिक गरी ल्याउनका लागि कार्यालयमा आउन भनेको हो । चौधरी ग्रुपले हडपेको जग्गा फिर्ता ल्याउने नाममा उनलाई चोख्याउने खेल सुरु भएको टीकाटिप्पणी सुरु भएको छ । 

कम्पनी रजिस्ट्रारको कार्यालयले च्याम्पियन फूटवेयरलाई दिएको प्रमाणपत्रमा विनोद चौधरी, लुनकरणदास चौधरी, अरुण चौधरीलगायत ७ जना सञ्चालक थिए । सरकारी जग्गा ‘च्याम्पियन फूटवेयर’को नाममा ल्याउन भूमिका खेल्ने व्यक्तिचाहिँ विनोद चौधरी थिए । कम्पनी दर्ताको प्रमाणपत्रको दोस्रो नम्बरमा विनोदको नाम छ । यद्यपि सीआईबीले अरुण चौधरी यो प्रकरणमा पक्राउ परेर रिहा भएपनि अनुसन्धान जारी नै रहेको जनाएको छ । 
००००
अख्तियार दुरुपयोग अनुसन्धान आयोगले कैलालीको टीकापुर नगर विकास जमितिको जग्गा घोटाला प्रकरणमा २४९ जनाविरुद्ध भ्रष्टाचार मुद्दा दायर गरेको छ । नगर विकास समितिका तत्कालीन अध्यक्ष  लगायतका पदाधिकारीविरुद्ध बिहीवार अख्तियारले विशेष अदालत काठमाडौंमा भ्रष्टाचार मुद्दा दायर गरेको हो । 

भ्रष्टाचार आरोप लाग्नेमा नापी र मालपोत अधिकृतसहित ६ जना कर्मचारी छन् । उनीहरूमाथि पदाधिकारीसँगको  मिलेमतोमा नक्कली रसिद बनाइ विकास समितिका प्लट घडेरी आफन्तको नाममा सारेको आरोप लगाइएको छ । तत्कालीन नापी अधिकृत मानबहादुर चन्दविरुद्ध एक करोड ९० लाख ३२ हजार १३६ रुपैयाँ जरिवाना र कैद माग गरिएको छ ।
००००
प्रधानमन्त्री पुष्पकमल दाहाल ‘प्रचण्ड’ले सङ्घीयता कार्यान्वयनको सवालमा प्रदेश सरकारका मुख्यमन्त्रीहरूले व्यक्त गरेको भावना यथाशीघ्र सम्बोधन गर्न सङ्घीय सरकारका मन्त्रीहरूलाई निर्देशन दिएका छन् । 

प्रधानमन्त्री प्रचण्डको अध्यक्षतामा सिंहदरबारमा बिहीवार उनीसहित मन्त्रिपरिषद्का सदस्यहरूसँग सातै प्रदेशका मुख्यमन्त्रीको बैठक बसेको थियो । सो अवसरमा उनले भने, ‘सङ्घीयताको सुदृढ कार्यान्वयन हामी सबैको साझा जिम्मेवारी हो । यहाँहरूले मुख्यमन्त्रीको चिन्ता र चासो बुझ्नु नै भयो । त्यसलाई गम्भीरतापूर्वक लिनुस् ।’
००००
नक्कली नेपाली नोट कारोबार गर्ने गिरोहका नाइकेसहित पक्राउ गरेका पाँच जनालाई बारा प्रहरीले सार्वजनिक गरेको छ । जिल्ला प्रहरी कार्यालयमा पत्रकार सम्मेलन गरी ती व्यक्तिलाई बिहीवार प्रहरीले सार्वजनिक गरेको हो ।
००००
सरकारले केन्द्रीय धनादेश र टिकट व्यवस्थापन तथा ‘फिलाटेलिक’ कार्यालय खारेज गरेको छ । मन्त्रिपरिषद्को बिहीवारको बैठकले ‘एक पालिका एक हुलाक’ कायम गर्ने, हुलाकको सङ्गठन संरचना परिवर्तन गर्ने र एक हजार ६३६ दरबन्दी खारेज गर्ने निर्णय गरेको सञ्चार तथा सूचना प्रविधिमन्त्री रेखा शर्माले जानकारी दिइन् ।
००००
सशस्त्र प्रहरी बलका १०० जना प्रहरी उपरीक्षक (एसपी)को सरुवा भएको छ  ।  
सशस्त्र प्रहरीले बिहीवार देशैभरका जिल्ला प्रमुखहरू सरुवा गरेको हो । समयअवधि पुगेका एसपीहरूको सरुवा गरेको सशस्त्र प्रवक्ता एसएसपी राजेन्द्र खड्काले लोकान्तरलाई जानकारी दिए ।
००००
सुन जाँचबुझ आयोगले केन्द्रीय अनुसन्धान ब्यूरो (सीआईबी)का डीएसपी रुगम कुँवरसँग बयान लिएको छ । ६० केजी सुन तस्करी विषयमा सीआईबीले जीवन चलाउनेलाई बयान लिएर छाडेको भन्दै कुँवरसँग बयान लिएको हो ।

डीएसपी कुँवर सीआईबीको मुद्दा शाखाका प्रमुख हुन् । ६० केजी सुन प्रकरणमा बेल्जियम नागरिक दावा छिरिङसँग कुराकानी भएको प्रमाण भेटिएपछि सीआईबीले चलाउनेलाई नियन्त्रणमा लिएको थियो ।

यसैबीच आयोगले सत्तारुढ नेकपा माओवादी केन्द्रका उपाध्यक्षसमेत रहेका पूर्वसभामुख कृष्णबहादुर महरासँग बिहीवार बयान लिएको छ । सिंहदरवारस्थित गृहमन्त्रालयको पुरानो भवनमा रहेको कार्यालयमा बिहीवार आयोगले महरासँग झण्डै डेढ घण्टा बयान लिएको हो ।
००००
कोशी प्रदेश सरकार र पहिचानसहित प्रदेशको पुनः नामकरण गर्न माग गर्दै आन्दोलन गरिरहेको संयुक्त संघर्ष समितिबीच वर्ता भएको छ । बिहीबारको  वार्ता सकारात्मक भएको बताइएको छ । 
००००
मोहन बैद्य नेतृत्वको क्रान्तिकारी कम्युनिस्ट पार्टीनिकट अखिल क्रान्तिकारीले चौधरी समूहले बाँसबारी छाला जुत्ता कारखानाबाट गैर(कानूनी रूपमा हडपेको १० रोपनी जग्गामा संचालित सीजी चाँदबाग स्कूललाई राष्ट्रियकरण गर्न माग गरेको छ ।
००००
सत्ता गठबन्धनका शीर्ष नेताहरूले सातवटै प्रदेशका मुख्यमन्त्रीसँग छलफल गरेका छन् । बिहीबार प्रधानमन्त्री निवास बालुवाटारमा प्रधानमन्त्री पुष्पकमल दाहाल प्रचण्डसहित गठबन्धनका शीर्ष नेताहरूले मुख्यमन्त्रीहरूसँग छलफल गरेका हुन् ।
००००
एकदिवसीय क्रिकेट सिरिजअन्तर्गत पहिलो खेलमा क्यानडाविरुद्ध पराजयको नजिक पुगेर पनि नेपालले रोमाञ्चक जीत दर्ता गरेको छ । तीन खेलको सिरिज अन्तर्गत कीर्तिपुरमा भएको पहिलो खेलमा घरेलु टोली नेपालले क्यानडाविरुद्ध रोमाञ्चक ७ रनको जीत दर्ता गरेको हो ।