नीति शाहको फिल्म ‘खजुरे ब्रो’ वैशाखमा प्रदर्शन हुने

मोडल नीति शाहको डेब्यु फिल्म ‘खजुरे ब्रो’ आगामी वैशाखमा प्रदर्शनमा आउने भएको छ । 

निर्माण पक्षले फिल्मको फस्टलुक पोस्टर सार्वजनिक गर्दै प्रदर्शन मिति घोषणा गरेको हो । 

फिल्म आगामी वैशाख २८ गते प्रदर्शन हुने भएको छ । 

पूर्वी नेपालमा ‘एथलेटिक्स’को महाकुम्भ मानिने ‘धरान रन’को १२ औं  संस्करणको अवसरमा धरानबासी दर्शकलाई साक्षी राख्दै पोस्टर सार्वजनिक गरिएको हो । ‘धरान रन’मा बोल्दै धरान उपमहानगर पालिकाका मेयर हर्क साम्पाङले आफूले पनि अभिनय गरेको र धरानमा नै छायाँकन गरिएको फिल्मले दर्शकको मन जित्ने विश्वास व्यक्त गरे । 

सार्वजनिक पोस्टरमा प्रमुख ४ जना पात्रलाई फिल्मकै गेटअपमा प्रस्तुत गरिएको छ ।  पोस्टरको डिजाइन रोयल भीमसेनले गरेका हुन् । 

यो फिल्मको मुख्य भूमिकामा रेअर राई, महेश त्रिपाठी, नीति शाह, नवीन मानन्धर रहेका छन् । धरान पुगेर पोस्टर र प्रदर्शन मिति सार्वजनिक गर्दा धरानका दर्शकलाई सम्मान पुगेको कलाकार तथा निर्माता नवीन मानन्धरले बताए । फिल्मको छायांकनको क्रममा धरानबासीले धेरै नै सहयोग गरेको हुनाले उनीहरुलाई धन्यवाद पनि दिने उद्देश्यले धरानमै पोस्टर सार्वजनिक गरिएको मानन्धरले बताए ।

अभिनेत्री नीतिले आफ्नो डेब्यु फिल्मको सुटिङ सकेर प्रदर्शन मिति समेत सार्वजनिक हुँदा निकै खुसी लागेको बताइन् । धरानसँग आफ्नो साइनो जोडिएको र खजुरेको कथाले आफूलाई छोएकोले फिल्म ‘खजुरे ब्रो’ आफ्नो लागी विशेष रहेको लेखक तथा निर्देशक सुरज सुनुवारले बताए । फिल्मको टिमले मेयर हर्क साम्पाङ​को श्रमदान अभियानमा समेत सहयोग गरेको छ । हर्कले श्रमदानमा निर्माण गरिरहेको श्रम संस्कृति पार्कमा पुगेर औजारहरू हस्तान्तरण गरेको छ । 

उक्त अभियानमा फिल्मका निर्माता/लेखक तथा निर्देशक सुरज सुनुवार, कलाकार तथा निर्माता नवीन मानन्धर, कलाकार रेयर राई, पुष्कर कार्की तथा धरानका स्थानीय कलाकारहरूको सहभागिता रहेको थियो । 

‘खजुरे ब्रो’ पारिवारिक व्यङ्ग्यात्मक ‘लाइट कमेडी’ जनरामा आधारित रहेको छ । यो फिल्ममा सुरज सुनुवारको लेखन तथा निर्देशन छ । फिल्ममा प्रकाश भुजेल, विनीता थापा मगर, सुष्मा निरौला, पुष्कर कार्की, मनिष राउत, प्रेम सुब्बा र सुजाता राईको पनि अभिनय रहेको छ । 

‘खजुरे ब्रो’ नीति शाहको डेब्यु फिल्म हो । यस्तै, फिल्ममा दार्जलिङ्गका कलाकार शान्तिला तामाङको पनि अभिनय छ । 

फिल्ममा धरान उपमहानगरपालिकाका प्रमुख हर्क साम्पाङले समेत विशेष भूमिकामा अभिनय गरेका छन् । दिव्य दृश्य इन्टरटेन्टमेन्टको ब्यानरमा निर्माण भएको फिल्म ‘खजुरे ब्रो’ को निर्माण नवीन मानन्धर र सुरज सुनुवारले गरेका हुन् । शिशिर बिसंखेले छायांकन गरेको फिल्ममा अनमोल गुरुङको संगीत छ । फिल्मको सह–निर्माता अनिल मानन्धर र पिकेश मानन्धर रहेका छन् । 

दिव्य दृश्य इन्टरटेन्टमेन्टले निर्माण गर्न लागेको फिल्ममा इन एसोसिएसन विथ मान्द्रो प्रोडक्सन र मल्टी प्रपोज प्रालिको रहेको छ । फिल्मलाई आरआर फिल्मसले वितरण गर्नेछ ।