२९ असार २०८३, सोमबार
लामो समय सेवामा संलग्न भइ सचिव पदबाट सेवा निवृत्त भएका कर्मचारीहरूको सोमवार विदाइ गरिएको छ ।
सिहरबारमा आयोजित कार्यक्रममा प्रधानमन्त्री पुष्पकमल दाहाल प्रचण्डले यस आर्थिक वर्षमा सेवा निवृत्त भएका १२ सचिवलाई दोसल्ला ओढाएर सम्मान गरे ।
सेवा निवृत्त हुने सचिवहरूमा यादवप्रसाद कोइराला, रामप्रसाद थपलिया, धनराज ज्ञवाली, गोपीकृष्ण खनाल, डा. दामोदर रेग्मी, दिनेशकुमार घिमिरे, देवकुमारी गुरागाईं, केवलप्रसाद भण्डारीलगायत रहेका छन् ।
सो अवसरमा प्रधानमन्त्री प्रचण्डले उच्च नेतृत्वसम्म रहेर हासिल गरेका अनुभव र विज्ञता राज्यले सदुपयोग गर्ने बताए ।
सेवा निवृत्त सचिव गुरागाईंले आफूहरूले कुनै पनि दबाब र प्रभावमा नपरीकन निरन्तर राष्ट्रको सेवा गर्न पाएको भन्दै खुशी व्यक्त गरिन् । उनले आगामी दिनमा पनि प्रत्यक्ष र अप्रत्यक्षरूपमा देशको सेवा गर्ने प्रतिबद्धता जनाइन् ।
कार्यक्रममा प्रधानमन्त्री प्रचण्डले नियत सफा राखेर काम गर्ने कुनै पनि राष्ट्र सेवक कर्मचारीमाथि समस्या पर्न नदिने प्रतिबद्धता जनाएका थिए ।
प्रधानमन्त्री कार्यालयमा भएको सचिवहरूको नियमित बैठकमा सोमवार उनले निर्दोषलाई समस्या भएमा त्यसको जिम्मेवारी आफूले लिने बताए ।
‘कार्यसम्पादन गर्दा कसैको भय र त्रासमा नपर्नु होला, कानूनबमोजिम काम गर्न डराउनु पर्दैन,’ कर्मचारीलाई ढाडस दिँदै प्रधानमन्त्री प्रचण्डले भने, ‘असल नियतले काम गरेको विषयमा निर्दोष मानिसलाई कहीँकतै समस्या भएमा त्यसको जिम्मेवारी मैले लिनेछु ।’
