प्रधानमन्त्री पुष्पकमल दाहाल प्रचण्ड आज (आइतवार) आफ्नो गृहजिल्ला चितवन जाँदै छन् ।

भरतपुर केन्द्रीय अस्पतालको ६८औं वार्षिकोत्सव समारोहको उद्घाटन गर्न उनी त्यहाँ जान लागेका हुन् ।

प्रधानमन्त्री प्रचण्ड दिउँसो १ बजे कार्यक्रममा सहभागी हुने भरतपुर अस्पतालले लोकान्तरलाई जानकारी दियो ।

यस्तै उनले ले चितवनको भरतपुर–१५ मा निर्माणाधीन गौतमबुद्ध अन्तर्राष्ट्रिय क्रिकेट रंगशालामा हुने पहिलो अन्तर प्रदेश राष्ट्रिय खेलकुद प्रतियोगिताको पनि औपचारिक उद्घाटन गर्ने कार्यक्रम रहेको भरतपुर महानगरपालिकाले जनाएको छ । सो कार्यक्रमको उद्घाटन अपरान्ह ४ बजे हुनेछ ।

संयोगवश नेकपा (माओवादी केन्द्र)का अध्यक्षसमेत रहेका प्रधानमन्त्री प्रचण्डकी छोरी रेनु दाहाल भरतपुर महानगरकी प्रमुख (मेयर) छिन् । उनी छोरीकै निम्तोमा खेलुकद कार्यक्रम उद्घाटन गर्न जान लागेका हुन् ।

पछिल्लो समय प्रधानमन्त्री प्रचण्ड आफ्नो यो कार्यकालमा नतिजा देखिनेगरी काम गर्ने बरु उद्घाटनजस्ता कार्यक्रममा धेरै समय खर्च नगर्ने बताइरहेका छन् । तर संयोगवश आज उनले एकैदिन दुईवटा कार्यक्रम उद्घाटन गर्नुपर्ने भएको छ ।