१० साउन २०८३, आइतबार
नेपाल इन्जिनियरिङ कलेजका पूर्वअध्यक्ष लम्बोदर न्यौपाने सम्पत्ति शुद्धीकरणको मुद्दामा दोषी ठहर भएका छन् ।
विशेष अदालतका अध्यक्ष टेकनारायण कुँवर र सदस्य न्यायाधीश रामबहादुर थापाको इजलासले आइतवार न्यौपानेलाई दोषी ठहर गरेको हो । उनलाई सजाय निर्धारणका लागि आगामी वैशाख १६ गते पेशी तोकिएको छ ।
सम्पत्ति शुद्धीकरण अनुसन्धान विभागले न्यौपानेसहित कलेजका तत्कालीन सञ्चालकविरुद्ध गैरकानूनी रुपमा सम्पति आर्जन गरेको आरोपमा मुद्दा दायर गरेको थियो ।
न्यौपाने बाहेक अन्यले सफाइ पाएका छन् ।
न्यौपानेले १२ करोड ४४ लाख रुपैयाँ गैरकानूनी रुपमा आर्जन गरेको अदालतले ठहर गरेको छ ।
उनले कलेजको रकम आफ्नो निजी खातामा हालेका थिए ।
५ वर्षसम्म उनले कलेजबाट मासिक ६ लाख रुपैयाँ पारिश्रमिक, १ करोड ५० लाख रुपैयाँको गाडी लिनुका साथै विभिन्न शीर्षकमा हजारौं रुपैयाँ भत्ता लिने गरेका थिए ।
उनले ५३ पटकसम्म कलेजको खातामा राख्नु पर्ने रकम निजी खातामा राखेको पाइएको छ। उनले करसमेत तिर्ने गरेका थिएनन् ।
कलेजका अर्का सञ्चालक रामरत्न उपाध्याय, इन्दिरा उपाध्याय, उपेन्द्र गौतम, लबराज भट्टराई, सूर्यबहादुर केसी (दिवंगत), र दीपक भट्टराई (दिवंगत) र हरिप्रसाद पाण्डेले सफाइ पाएका छन् ।
