कर्णाली प्रदेशको मुख्यमन्त्रीमा नेकपा एमाले प्रदेश सभा संसदीय दलका नेता यामलाल कँडेलले नियुक्त भएका छन्।

कर्णाली प्रदेशका प्रदेश प्रमुख तिलक परियारले उनलाई मंगलवार मुख्यमन्त्रीमा नियुक्त गरेका हुन् ।

सत्ता साझेदार एमाले र माओवादी केन्द्रबीचको सहमतिका आधारमा कँडेलले मुख्यमन्त्रीमा दाबी पेस गरेका थिए ।

४० सदस्यीय कर्णाली प्रदेश सभामा सरकार गठनका लागि २१ जना सांसदको आवश्यकता पर्छ ।

उनलाई एमालेका ९, माओवादी केन्द्रका १३ र एकीकृत समाजवादीका १ सहित २३ प्रदेश सभा सदस्यको समर्थन छ ।

मुख्यमन्त्री बन्नका लागि समर्थन गरे पनि मन्त्रालय बाँडफाँटमा कुरा नमिलेसम्म सरकारमा नजाने माओवादीको अडान छ ।

माओवादीले आर्थिक मामिला तथा योजना, भौतिक पूर्वाधार तथा शहरी विकास, उद्योग, पर्यटन, वन तथा वातावरण र सामाजिक विकास मन्त्रालयमा दाबी राख्दै आएको छ ।