काठमाडौं, २९ असोज— निर्वाचन आयोगमा दर्ता भएका ५२ दलले आइतबार समानुपातिक उम्मेदवारको बन्द सूचि पेश गरेका छन् ।
साँझ आयोगमा पत्रकार सम्मेलन गरी निर्वाचन आयोगका प्रमुख निर्वाचन आयुक्त डा. अयोधिप्रसाद यादवले आयोगमा दर्ता भएका ५२ दलले प्रदेश तथा प्रतिनिधिसभाको निर्वाचनका लागि बन्द सूचि पेश गरेको बताए ।
आयोगले समानुपातिक तर्फको उम्मेदवारको सूचि बुझाउन आईतबार विहान १० बजदेखि अपरान्ह ५ समयसीमा दिएको थियो ।
आयोगका अनुसार सबै भन्दा पहिलो समानुपातिकतर्फको उम्मेदवारको बन्द सूचि राष्ट्रिय यथार्थवादी पार्टी, नेपालले बुझाएको छ ।
बन्द सूचीमा राजनीतिक दलहरू ५० प्रतिशत महिला समावेश गर्नुपर्ने प्रावधान छ ।
संविधानसभाबाट जारी नेपालको संविधानअनुसार प्रतिनिधिसभा तथा प्रदेशसभाका लागि पहिलोपटक यस्तो उम्मेदवारी दर्ता भएको हो ।
निर्वाचन आयोगले प्रतिनिधिसभाको समानुपातिकतर्फ ११० तथा प्रदेशसभाको समानुपातिकतर्फ २२० पदका लागि आइतबार उम्मेदवारहरूको बन्दसूची बुझाउने कार्यतालिका तय गरेको थियो ।
आयोगले समानुपातिक तर्फको उम्मेदवारको बन्द सूचि सच्याउन कार्तिक १२ गतेसम्मको समय दिएको छ ।
यसैबीच प्रमुख निर्वाचन आयुक्त डा. यादवले निर्वाचन आचारसंहिता उलंघन नगर्न पनि सरकार र राजनीतिक दलहरुलाई पुनः सचेत गराएका छन् ।
