१९ असार २०८३, शुक्रबार
सरकार सहकारी प्रकरणमा छानबिन समिति गठन तयार नभएको भन्दै कांग्रेसले फेरि पनि संसद् अवरुद्ध गर्ने भएको छ ।
प्रधानमन्त्रीले सहकारीबारे छानबिन गर्न समिति गठन गर्न सकिने आश्वासन कांगेसलाई दिएपछि उसले सकारात्मक हुँदै उपप्रधान एवं गृहमन्त्री रवि लामिछानेलाई बोल्न दिनेसमेत बताएको थियो ।
सहकारीको रकम हिनामिनामा संलग्न रहेको भन्दै कांग्रेसले दाबी गरे अनुसार रविको नाम उल्लेख पनि नगर्ने र टालटुले समिति गठन गर्न खोजेपछि संसद् अवरुद्धको सिलसिला जारी रहने सांसद रामहरि खतिवडाले जानकारी दिए ।
‘संसदीय समिति गठन गर्छु भनेर प्रधानमन्त्रीले भनेपछि हामीले पनि सदन खुलाउने र गृहमन्त्रीलाई बोल्न दिन्छौं भनेर सकारात्मक जवाफ दियौं,’ खतिवडाले भने, ‘गृहमन्त्रीको यी यी सहकारीमा स्वार्थ बाझिएको छ, गोर्खा मिडियामा यसरी पैसा आएको छ, यीबारे पनि बोल्नुपर्छ र छानबिन हुनुपर्छ भन्ने हाम्रो मागका विषयमा सत्ता पक्षले गोलमटोल जवाफ दिएपछि परिस्थिति फेरि बिग्रियो ।
दलहरूबीच सहमतिको प्रयत्न भएको भन्दै बिहीबार ११ बजेलाई तय भएको संसद् बैठक अपरान्ह ४ बजेका लागि सारिएको थियो ।
