२४ जेठ २०८३, आइतबार
आईसीसी टी–२० क्रिकेट विश्वकप प्रतियोगितामा आयोजक अमेरिकाले विजयी शुरूवात गरेको छ ।
आइबार बिहान डल्लासस्थित ग्रान्ड प्रेरी रंगशालामा भएको उद्घाटन खेलमा अमेरिकाले छिमेकी प्रतिद्वन्द्वी क्यानडालाई ७ विकेटले हराउँदै विजयी शुरूवात गरेको हो ।
क्यानडाले दिएको १९५ रनको विशाल लक्ष्य अमेरिकाले १४ बल बाँकी छँदै मात्र ३ विकेटको क्षतिमा पूरा गर्यो ।
अमेरिकाको जीतमा २ जनाले अर्धशतक बनाए । आरोन जोन्सले शतकनजिक पुग्दै अविजित ९४ रन जोडे ।
यस्तै एड्रियस गोउसले ६५, कप्तान मोनाक पटेलले १६ र कोनी एन्डरसनले अविजित ३ रन बनाए । यसअघि ओपनर स्टेभेन टेलर भने खाता नखोली आउट भएका थिए ।
क्यानडाका लागि कलीम साना, डिलोन हेलिगर र निखिल दत्तले समान १ विकेट लिए ।
यसअघि टस हारेर ब्याटिङको निम्तो पाएको क्यानडाले निर्धारित २० ओभरमा ५ विकेट गुमाएर १९४ रन बनाएको थियो ।
क्यानडाका लागि २ खेलाडीले अर्धशतक बनाए । नवनीत धलिवालले ६१ तथा निचोलास किर्टोनले ५१ रन जोडे ।
यस्तै श्रेयस मोभ्भाले अविजित ३२ रन जोडेका थिए ।
अमेरिकाका अलि खान, हर्मीत सिंह र कोने एन्डर्सनले १–१ विकेट लिए ।
अमेरिका र वेस्ट इन्डिजको संयुक्त आयोजनामा भइरहेको प्रतियोगिता नेपाली समयअनुसार जुलाई २ मा सकिँदैछ ।
प्रतियोगितामा २० टोली सहभागी छन् ।
आइतबार साँझ सवा ८ बजे सहआयोजक वेस्ट इन्डिज र पपुवा न्युगिनीबीच अर्को खेल हुनेछ ।
समूह ‘डी’मा रहेको नेपालले भने पहिलो खेल जुन ५ मा नेदरल्यान्ड्ससँग खेल्नेछ ।
नेपालको समूहमा दक्षिण अफ्रिका, श्रीलंका, बंगलादेशजस्ता टेस्ट राष्ट्र पनि छन् ।
