३० असार २०८३, मंगलबार
चितवनमा अविरल वर्षासँगै आएको पहिरोले लामो दूरीमा चल्ने दुईवटा गाडी बगाएको छ । वीरगञ्जबाट काठमाडौं आउँदै गरेको माइक्रो बस (विङ्गर गाडी) र काठमाडौंबाट रौतहटको गौर जाँदै गरेको गणपति डिलक्सको बस बगेर त्रिशूली नदीमा बेपत्ता भएका छन् ।
भरतपुर महानगरपालिका २९ स्थित सिमलतालमा शुक्रवार बिहान ३ बजे उक्त घटना भएको सशस्त्र प्रहरी बलका सहप्रवक्ता डीएसपी शैलेन्द्र थापाले जानकारी दिए ।
गौर जाँदै गरेको बसमा अन्दाजी ४०–४१ जना तथा वीरगञ्जबाट आउँदै गरेको विङ्गर गाडीमा करिब २०–२१ जना यात्रु सवार रहेको उनले बताए ।
खोज तथा उद्धारका लागि उक्त स्थानमा सशस्त्र प्रहरीको १७ नम्बर गण चितवनबाट ३५ जना र विपद् व्यवस्थापन तालिम शिक्षालयबाट ७ गोताखोरसहित २० जना परिचालन भएको डीएसपी थापाले जानकारी दिए ।
पहिरोका कारण पृथ्वी राजमार्गअन्तर्गत मुग्लिन–नारायणगढ सडक अवरुद्ध रहेको उनले जारी गरेको विज्ञप्तिमा उल्लेख छ ।
