२० असार २०८३, शनिबार
सरकारले प्रधानमन्त्री केपी शर्मा ओलीको प्रमुख राजनीतिक सल्लाहकार र आर्थिक सल्लाहकार नियुक्त गरेको छ ।
बिहीबार सिंहदबारमा बसेको मन्त्रिपरिषद् बैठकले प्रधानमन्त्री ओलीको प्रमुख राजनीतिक सल्लाहकारमा विष्णु रिमाल र आर्थिक सल्लाहकारमा डा युवराज खतिवडालाई नियुक्त गर्ने निर्णय गरेको हो ।
नेकपा (एमाले)का उपमहासचिवसमेत रहेका रिमाल यसअघि पनि ओली प्रधानमन्त्री हुँदा प्रमुख राजनीतिक सल्लाहकार नै थिए ।
डा खतिवडा पूर्वअर्थमन्त्री तथा नेपाल राष्ट्र बैंकका पूर्वगभर्नर हुन् ।
बैठकमा सहभागी एक मन्त्रीका अनुसार प्रधानमन्त्री कार्यालयमा रहेको विभिन्न समितिलाई समेत पूर्णता दिने निर्णय भएको छ ।
सरकारले यसअघि वरिष्ठ अधिवक्ता रमेश बडाललाई महान्यायाधिवक्तामा नियुक्त गरेको थियो । महान्यायाधिवक्ताले सरकारको मुख्य कानूनी सल्लाहकारको रुपमा काम गर्नेछन् ।
प्रधानमन्त्री केपी शर्मा ओलीको सिफारिसमा राष्ट्रपति रामचन्द्र पौडेलले बडाललाई महान्यायाधिवक्तामा नियुक्त गरेका थिए ।
