२८ जेठ २०८३, बिहीबार
खानेपानी मन्त्री प्रदीप यादवले मेलम्चीको पानी नआउँदासम्म वैकल्पिक माध्यमबाट पानी वितरण गर्न निर्देशन दिएका छन् ।
शनिबार सुन्दरीजलस्थित मेलम्ची सुरुङ आउटलेटको निरीक्षण गर्ने क्रममा मन्त्री यादवले यस्तो बताएका हुन् ।
वर्षायाममा मेलम्चीबाट पानी ल्याउन नसकिने अवस्थामा अन्य स्रोतहरूबाट पानी व्यवस्थापन गर्न उनले निर्देशन दिए ।
काठमाडौंवासीको लागि बाह्रै महिना सफा, शुद्ध र स्वच्छ पानी उपलब्ध गराउन पनि उनले आग्रह गरे ।
'मानिसको जीवनमा सबैभन्दा महत्त्वपूर्ण वस्तु पानी हो । काठमाडौंमा वर्षभरि सफा, शुद्ध र स्वच्छ पानी वितरण गर्न जे आवश्यक पर्छ, त्यो गर्नुस् । बजेट, आधुनिक उपकरण र जनशक्ति जे चाहिन्छ, मन्त्रालयबाट म व्यवस्था गर्छु,' उनले भने ।
मन्त्री यादवले हाल काठमाडौंमा पानीको अभावले जनजीवन कष्टकर बन्दै गएको बताए । वैकल्पिक स्रोतहरू प्रयोग गरेर पानी आपूर्ति गर्न उनले निर्देशन दिए ।
उनले बागमती नदीको पानी र भूमिगत पानीलाई प्रशोधन गरी वितरणको व्यवस्था मिलाउन समेत आग्रह गरेका छन् ।
