२९ असार २०८३, सोमबार
लुम्बिनी प्रदेशका मुख्यमन्त्री जोखबहादुर महराले आइतबार (भोलि) विश्वासको मत लिने भएका छन् ।
प्रमुख सत्ता साझेदार नेकपा एमालेले सरकारलाई दिएको समर्थन फिर्ता लिएपछि मुख्यमन्त्री महरा अल्पमतमा परेका थिए ।
आइतबार दिउँसो १ बजे बस्ने प्रदेशसभा बैठकमा मुख्यमन्त्री महराले विश्वासको मत लिने कार्यसूची रहेको प्रदेशसभाका सचिव दुर्लभकुमार पुन मगरले जानकारी दिए ।
सरकारमा सहभागी दलले समर्थन फिर्ता लिएपछि ३० दिनभित्र मुख्यमन्त्रीले सदनबाट विश्वासको मत लिनुपर्ने संवैधानिक व्यवस्था छ ।
केन्द्रमा नेकपा एमाले र नेपाली कांग्रेसबीच साझेदारी बनेपछि एमालेले समर्थन फिर्ता लिने सरकारमा सहभागी ५ जना मन्त्रीले राजीनामा दिएर सरकारबाट बाहिरिएका थिए ।
लुम्बिनी अब कांग्रेस र एमाले नयाँ सरकार बनाउन लागेको छन् । रोल्पाबाट निर्वाचित नेकपा माओवादी संसदीय दलका नेता महरा २३ चैतमा मुख्यमन्त्रीमा नियुक्त भएका थिए ।
८७ सदस्यीय लुम्बिनी प्रदेशसभामा ११ दलको प्रतिनिधित्व छ । सरकार बनाउन ४४ सांसदको समर्थन चाहिन्छ ।
लुम्बिनीमा एमालेका २९ र कांग्रेसका २७ सांसद छन् ।
यस्तै, नेकपा (माओवादी केन्द्र)का (सभामुखसहित) ११, राष्ट्रिय प्रजातन्त्र पार्टी (राप्रपा) र नागरिक उन्मुक्तिका ४/४, जनता समाजवादी पार्टी (जसपा) २, जनमत पार्टी र लोकतान्त्रिक समाजवादी पार्टी (लोसपा)का ३/३, जसपा नेपाल, राष्ट्रिय जनमोर्चा र एकीकृत समाजवादी र स्वतन्त्रका १/१ जना सांसद छन् ।
