सौर्य एयरलाइन्सको जहाज दुर्घटनामा परी घाइते भएका पाइलट मनिषरत्न शाक्यको दिमाग(ब्रेन)मा दाग देखिएको छ । 

सिनामंगलस्थित केएमसी अस्पतालमा उपचाररत पाइलट शाक्यको ब्रेनमा दाग देखिएको अस्पतालका न्युरो सर्जन डा. अमित थापाले लोकान्तरलाई जानकारी दिए । 

थापाका अनुसार अब एमआरआई गरेपछि उक्त दागबारे विस्तृत पत्ता लाग्ने छ । टाउकोको एमआरआई गर्ने तयारी रहेको उनले बताए । 'ब्रेनमा सानो दागजस्तो देखिएको छ । त्यो कस्तो र के हो भन्ने यकिन छैन,' लोकान्तरसँग उनले भने, 'अब एमआरआई गरेपछि थाहा होला । एमआरआई गर्ने तयारी छ ।'

यस्तै, शाक्यको 'रिब्स र स्पाइन फ्र्याक्चर' भएको अस्पतालकै डा. नवीन मिश्रले बताए । फ्र्याक्चर भए पनि यताउति नभएकोले त्यसमा धेरै खतरा नरहेको उनको भनाइ छ । 

बुधबार बिहान त्रिभुवन अन्तर्राष्ट्रिय विमानस्थलमा भएको जहाज दुर्घटनामा शाक्य घाइते भएका थिए । शाक्यको अवस्था अहिलेसम्म खतरामुक्त छ । उनी कुराकानी गर्नसक्ने अवस्थामा छन् ।

दुर्घटनामा पाइलट शाक्यको मात्र उद्धार सम्भव भएको थियो । विमानमा सवार अन्य १८ जनाको मृत्यु भइसकेको छ ।